Қоғамдық тәртіп пен азаматтардың қауіпсіздігін қамтамасыз ету – мемлекеттіліктің негізгі тіректерінің бірі. Бұл бағытта алдыңғы шепте тұрған ішкі істер органдарының, атап айтқанда полиция қызметкерлерінің атқаратын рөлі ерекше. Қазіргі таңда полиция тек құқық бұзушылықтарға ден қойып, қылмысты ашумен шектелмейді, сонымен қатар қоғамда тәртіп пен сенім орнатушы күшке айналып отыр. Осындай маңызды сала өкілдерінің қызметіне жан-жақты қолдау көрсету – мемлекет пен жергілікті басқару органдарының басты міндеттерінің бірі болып қала бермек.

Түркістан облысы Жетісай ауданының әкімі Серік Үсенұлы Мамытов осы мақсатта аудандық полиция бөлімшесіне арнайы барып, құқық қорғау қызметінің ішкі жүйесімен, олардың жұмыс барысымен егжей-тегжейлі танысты. Аудан басшысы алдымен Жедел басқару орталығының жұмысын бақылап, ғимараттың техникалық және инфрақұрылымдық жағдайымен танысты. Бұл сапар тек танысу үшін емес, полицейлердің күнделікті қызметін жеңілдетуге қажетті жағдайларды саралап, олардың материалдық-техникалық қамтамасыз етілу деңгейін бағамдау үшін де ұйымдастырылған.

Аудандық полиция бөлімінің басшысының міндетін уақытша атқарушы Мейірхан Құрбанбаевтың айтуынша, соңғы уақытта бөлім қызметкерлерінің қылмыстың алдын алу мен қоғамдық тәртіпті сақтау бағытындағы жұмыстары едәуір жанданып, нәтижесінде ауыр емес қылмыс түрлерінің саны айтарлықтай азайған. Бұл көрсеткіштер – жергілікті тәртіп сақшыларының кәсібилігі мен жанқиярлық еңбегінің айқын дәлелі. Профилактикалық рейдтер, кешкі және түнгі кезекшіліктер, учаскелік инспекторлардың халықпен тығыз жұмыс жүргізуі сынды шаралар қылмыстың алдын алуға нақты үлес қосуда.

Аудан әкімі полиция қызметкерлерімен тілдесу барысында, құқық қорғау саласының қызметкерлеріне артылған жауапкершілік пен сенімнің жоғары екенін, олардың қоғамдағы бейнесі мен қызмет сапасы – тұрғындардың мемлекетке деген сенімінің көрсеткіші екенін атап өтті. Мемлекет басшысы да өз жолдауларында құқық қорғау жүйесінің жаңғыртылуына, ішкі істер органдарының халыққа жақын болуына және олардың әлеуметтік жағдайына айрықша көңіл бөліп келеді. Президент Қасым-Жомарт Тоқаев атап өткендей, құқық қорғау органдарының қызметі «заң үстемдігі мен әділеттілік принциптеріне» негізделуі тиіс. Осы мақсатта азаматтарға ашық әрі қолжетімді құқық қорғау жүйесін қалыптастыру жолында нақты қадамдар жасалуда.

Полиция ғимаратын аралау барысында Серік Үсенұлы бірнеше бөлімшелердің қазіргі техникалық жағдайы сын көтермейтінін атап өтіп, ескірген ғимараттарды жөндеу немесе жаңадан салу мәселесі бойынша сметалық құжаттарды дайындау жөнінде нақты тапсырмалар берді. Бұл – құқық қорғаушылардың еңбек жағдайын жақсартуға бағытталған нақты іс-шаралардың бірі. Сонымен қатар әкімдік тарапынан полиция қызметінің тиімділігін арттыруға бағытталған қолдаулар бұрын да көрсетілген. Мәселен, аудан әкімінің қолдауымен тәртіп сақшыларына жедел шақыртуларға жылдам жетуге мүмкіндік беретін екі қызметтік автокөлік, сондай-ақ байланыс құралдары – отыз рация берілген. Мұның бәрі – құқық қорғау қызметінің материалдық-техникалық базасын жаңарту арқылы олардың жұмыс сапасын көтеруге арналған нақты қадамдар.

Қоғамда құқықтық тәртіпті сақтау, заң талаптарын орындау мәдениетін қалыптастыру – тек полицияның емес, бүкіл елдің ортақ міндеті. Бірақ бұл жолда ең алдыңғы шепте жүретіндер – дәл осы тәртіп сақшылары. Олар күн сайын қауіп-қатерге бетпе-бет келіп, өз өмірлерін ел тыныштығы жолында қауіпке тігеді. Сондықтан да полиция қызметкерлеріне жасалатын әр қолдау – тек бір салаға ғана емес, тұтас қоғамның тыныштығы мен қауіпсіз болашағына салынған инвестиция деп қарастыру керек.

Жетісай ауданында жүзеге асырылып жатқан осындай қолдау шаралары өзге өңірлерге де үлгі болуға әбден лайық. Құқық қорғау органдары мен жергілікті атқарушы билік арасындағы осындай өзара іс-қимыл мен қолдау тетіктері қылмыстың алдын алуға, қоғамда заң мен тәртіпке деген сенімді нығайтуға, халықпен кері байланысты жандандыруға нақты әсер ететіні сөзсіз. Бүгінгі таңда полиция қызметінің жаңаша бағыт алып, адам құқығы мен заң үстемдігін басты қағида етіп ұстануы – мемлекетіміздің демократиялық дамуының нақты белгісі.

Жетісай ауданында орын алған бұл іс-шара – құқық қорғау саласындағы реформалардың өңірлік деңгейде қалай жүзеге асып жатқанын айқындайтын нақты көрініс. Бұл бағыттағы жұмыстар жалғаса бермек. Себебі құқық пен тәртіпті сақтау – ел болашағының кепілі.