Қазақстанда алаяқтар телефон нөмірлерін қолдан жасау арқылы азаматтарды алдап, олардың атынан несие рәсімдеу жағдайлары жиілеп барады. Жасанды интеллект және цифрлық даму вице-министрі Дмитрий Мунның айтуынша, түсіндіру жұмыстары арқылы мұндай қылмыстарды алдын алуға болады. 

Мунның айтуынша, қазір қылмыскерлер "нөмірді басып алу" технологиясын пайдаланады. Бұл кезде телефон экранында ресми нөмір (мысалы, 1414) сияқты көрінгенімен, шын мәнінде ол алаяқтардың нөмірі болып шығады.

"1414-тен хабарлама келген кезде алаяқтардың араласуы байқалса, біздің министрлік істей алатын жалғыз нәрсе — түсіндіру жұмыстарын жүргізу және азаматтарға ешқашан код айтпау керектігін ескерту", – деді Дмитрий Мун.

Вице-министрдің айтуынша, егер азаматтар SMS арқылы келген растау кодын байқамай алаяқтарға айтып қойса, ең бастысы  сол сәтте сөйлесуді тоқтату керек.

"Кейде қоңырау шалушы таныс адамның атын атап, тіпті WhatsApp-та белгілі адамдардың суретін пайдаланады немесе өзін мемлекеттік орган қызметкері ретінде таныстырады. Бірақ сіз кодты айтып қойсаңыз да, бұл бірден ақпараттың таралуына әкелмейді. Дегенмен, бұл — алаяқтардың сенімге кіруінің алғашқы қадамы", — деді ол.

Цифрлық даму министрлігі қазақстандықтарды ешкімге растау кодтарын және жеке деректерді бермеуге, беймәлім қоңыраулар мен хабарламаларға жауап бермеуге, күмәнді жағдайларда ресми нөмірлерге өзіңіз қайта қоңырау шалуға кеңес береді.