Республикалық «Таза Қазақстан» экологиялық акциясы аясында Шымкент қаласының прокуратурасы «Мөлдір бұлақ» іс-шарасын ұйымдастырды. Қала прокуроры Елдос Сағиевтің қатысуымен прокуратура қызметкерлері Қошқар ата өзенінің бастауындағы аумақты тазалап, табиғи су көздерін қорғауға бағытталған жұмыс жүргізді.

Іс-шараның негізгі мақсаты – су көздерінің тазалығын сақтау, қоршаған ортаны қорғау және тұрғындар арасында табиғатқа жанашырлықпен қарау мәдениетін қалыптастыру. Қошқар ата өзені – Шымкенттің табиғи нысандарының бірі. Сондықтан оның бастауын таза ұстау, айналасына қоқыс тастамау және табиғи ортасына ұқыпты қарау қаланың экологиялық жағдайы үшін маңызды.

Тазалық жұмыстарына қатысқан прокуратура қызметкерлері табиғатты қорғау тек арнайы мекемелердің міндеті емес екенін атап өтті. Қала прокуроры Елдос Сағиев таза қала қалыптастыру әр тұрғынның жауапкершілігіне байланысты екенін айтып, қоршаған ортаға ұқыпты қараудың маңызын жеткізді. Оның айтуынша, экологиялық қолайлы ортаны сақтау әр адамның күнделікті әрекеті мен жеке үлгісінен басталады.

«Таза Қазақстан» акциясы аясындағы «Мөлдір бұлақ» бастамасы табиғи су көздерін қорғауға және экологиялық мәдениетті нығайтуға бағытталған. Мұндай жұмыстар тұрғындардың қоршаған ортаға деген көзқарасын өзгертуге, қоғамдық жауапкершілікті арттыруға және туған өлкенің табиғи байлықтарын сақтауға назар аудартады.

«Заң мен тәртіп» қағидаты қоршаған ортаға ұқыпты қараудан және ортақ ережелерді сақтаудан да көрінеді. Қоғамдық орындар мен табиғи аумақтардың тазалығын сақтау, белгіленген талаптарды орындау және ортақ мүлікке ұқыпты қарау – азаматтық жауапкершіліктің маңызды бөлігі. Табиғатты ластауға жол бермеу үшін тазалықты бақылаумен қатар, әр адамның өз әрекетіне жауапкершілікпен қарауы қажет.

Шымкент қаласының прокуратурасы тұрғындарды табиғатқа жанашырлық танытып, өзен-көлдердің маңын таза ұстауға және қоршаған ортаға зиян келтіретін әрекеттерге жол бермеуге шақырады. Туған өлкенің табиғи байлығын сақтау – бүгінгі ұрпақтың ғана емес, келешек алдындағы да жауапкершілігі.