Шымкент қаласында денсаулық сақтау саласы жаңа технологиялар арқылы үлкен өзгерістерге бет алды. Қаладағы бірнеше мемлекеттік емхана жасанды интеллект жүйелерін енгізіп, дәрігерлердің жұмысын жеңілдетіп, пациенттерге сапалы медициналық қызмет көрсетуге бағытталған пилоттық жобаларды қолға алған. Бұл туралы қала әкімінің орынбасары Сәрсен Абайұлы баяндады.

      Ең алдымен, PULS AI атты интеллектуалды ассистент қолға алыныпты. Бұл жүйе дәрігерге нақты диагноз қоюға және ем тағайындауға көмектеседі. Қаладағы №12 мемлекеттік емханада пилоттық жоба басталып, дәрігерлер мен пациенттер тарапынан жақсы пікірлер жинақталуда. PULS AI емхана қызметкерлеріне диагноз қою кезінде қосымша көмек көрсетіп, қателіктерді азайтуға мүмкіндік береді.

       Сонымен қатар, «ЖИ терапевті» жүйесі де іске қосылды. Бұл жүйе пациенттің жағдайын автоматты түрде бағалап, ем алу бағытын ұсынады. Пилоттық енгізу №4 және №8 қалалық емханаларда жүргізілуде. Жүйені оқыту барысында дәрігерлер автоматты бағалау нәтижесін көріп, пациентке қажетті емді дәл тағайындай алады. Бұл технология дәрігер мен пациент арасындағы уақытты үнемдеуге, сондай-ақ емдеу сапасын арттыруға септігін тигізеді.

       КТ-суреттерін талдауда Cerebra AI жүйесі үлкен рөл атқарып отыр. Бұл жасанды интеллект инсультті ерте кезеңде анықтауға мүмкіндік береді. №1 және №2 қалалық емханаларда сәтті енгізілген бұл жүйе дәрігерлерге пациенттің жағдайын тез әрі нақты бағалауға көмектеседі. Әсіресе инсульт сияқты өмірге қауіпті жағдайларда Cerebra AI пациенттің өмірін сақтауға тікелей үлес қосады.

       Пациенттермен байланыс сапасын арттыру мақсатында ЖИ негізіндегі автоматты қоңырау шалу жүйесі де пайдаланылуда. №4 және №8 қалалық емханаларда оқытылған бұл жүйе пациенттерге медициналық кеңес беру, емге шақыру немесе ақпарат беру жұмыстарын автоматтандырады. Осы арқылы емхана қызметкерлері пациентке көңіл бөліп, жеке уақытын тиімді пайдалана алады.

       Медицина қызметкерлерінің қауіпсіздігін қамтамасыз ету үшін смарт-бейнежетондар енгізілді. Пилоттық аясында 10 бейнежетон орнатылып, бейнеағындар мен деректер ЖИ негізінде сараланып, полицияның «Жедел басқару орталығына» жіберіледі. Бұл технология қызметкерлердің қауіпсіздігін арттырып, кез келген төтенше жағдайда жедел әрекет етуге мүмкіндік береді.

        Сонымен қатар, кадрлық жұмыстарды цифрлық жүйеге көшіру бағытында «HR-process» жобасы іске қосылды. №2 қалалық емханада орнатылған бұл жүйе кадрлық іс қағаздарын бұлтты форматта жинақтап, сақтау және басқару жұмыстарын жеңілдетеді. Енді қызметкерлердің деректері қауіпсіз түрде сақталып, қолжетімділік артты.

     Осылайша, Шымкент қаласындағы денсаулық сақтау саласы жаңа технологиялар мен жасанды интеллект жүйелерін енгізу арқылы дамып келеді. Пилоттық жобалар нәтижесінде дәрігерлердің жұмысы жеңілдегенімен қатар, пациенттерге көрсетілетін қызмет сапасы артты. ЖИ жүйелері емхана мен науқас арасындағы байланысты жақсартып, қауіпсіздік пен тиімділікті қамтамасыз етеді. Бұл бастамалар Шымкентті Орталық Азиядағы заманауи медицина орталықтарының біріне айналдыратыны сөзсіз.