Соңғы жылдары Шымкент қаласы цифрлық технологияларды дамытуда айтарлықтай  жетістіктерге жетуде. Қала «Smart City» эталондық стандарттарын енгізіп, жасанды интеллекттің мүмкіндіктерін күнделікті өмірге ендіру арқылы білім, қауіпсіздік және қалалық қызметтерді жаңа деңгейге көтеруді мақсат етіп отыр. Қала әкімінің орынбасары Сәрсен Абайұлының айтуынша, бұл бағыттағы жұмыстар кезең-кезеңімен жүзеге асырылып, қала өміріне елеулі өзгерістер енгізуде.

     Білім саласында цифрлық жаңалықтардың бірі  «Alaqan» жүйесі. Бұл жүйе оқушылардың алақанындағы қан тамырлары суретін тану арқылы биометриялық сәйкестендіруді жүзеге асырады. Қаладағы 100 мектепте енгізілген жоба 118 мыңнан астам оқушыны қамтиды. Оның ішінде ата-аналар арқылы тіркелгендер саны 101 мың, ал мектептерде нақты жүйені қолданатындар  шамамен 68 мың. Әлеуметтік осал санаттағы оқушылардың саны да 30 мыңнан асты. «Alaqan» тек қауіпсіздікті қамтамасыз етіп қана қоймай, оқушылардың мектептегі белсенділігін қадағалауға мүмкіндік береді.

      Тағы бір маңызды жоба  «Айқын». Бұл кешен бейнебақылау, турникет, өрт дабылы және Face ID жүйелерін біріктіреді. Негізгі мақсат мектептерде қауіпсіз ортаны қамтамасыз ету. 2025 жылы 147 мектепке 10 мыңға жуық камера орнатылып, оқушылар мен мұғалімдердің қауіпсіздігі күшейтіледі. Сонымен қатар, 82 мектепте арнайы аппараттық кешендер, 136 мектепте ішкі құрылымдық жүйелер ретке келтіріледі. «Айқын» жобасы тек қауіпсіздікке ғана емес, мектеп инфрақұрылымын заманауи стандарттарға бейімдеуге де үлес қосады.

      Қаланың білім саласындағы жаңалықтары осымен шектелмейді. Protector AI жүйесі мектептерде қауіп-қатерді алдын ала анықтап, оқушылар мен ұстаздар үшін қауіпсіз ортаны қалыптастыруға көмектеседі. Мысалы, №23 мектеп-лицейінде жүргізілген пилоттық сынақ кезінде жүйе 34 ықтимал қауіпті жағдайды анықтады. Бұл құрал мектептегі қауіпсіздікті күшейтуде маңызды рөл атқарады.

      Шымкенттің цифрлық жаңалықтары тек білім саласына ғана шектелмейді. Жасанды интеллект пен «Smart City» стандарттарының көмегімен қала әкімдігі тұрғындарға қызмет көрсету, инфрақұрылымды басқару және қауіпсіздікті қамтамасыз етуді тиімді жүргізуде. Мысалы, жол қозғалысын бақылау, коммуналдық қызметтердің жұмысын оңтайландыру, қалалық қауіпсіздікті қамтамасыз ету барлығы цифрлық технологиялар арқылы жетілдірілуде.

      Қала әкімдігі бұл бағыттағы жобаларды кезең-кезеңімен дамытып, жаңа пилоттық бағдарламаларды іске қосуға ниетті. Алдағы уақытта жасанды интеллект білім беру, медицина, тұрғын үй-коммуналдық салаларда инновациялық шешімдерге жол ашпақ.

    Осылайша, цифрлық даму мен жасанды интеллекттің үйлесімі қала өмірін түбегейлі өзгертіп, Шымкентті тек Орталық Азиядағы экономикалық және мәдени орталық қана емес, цифрлық инновациялардың үлгісі болатын мегаполиске айналдырды. Жаңа технологиялар қала тұрғындарының күнделікті өмірін жеңілдетіп, қауіпсіздікті арттырып, білім беру сапасын жаңа деңгейге көтеріп отыр.