Жалған диагноздар мен «қағаз жүзіндегі» қызметтер: Түркістан облысында медицина саласындағы ірі заңбұзушылықтар әшкереленді, деп жазады Оinet.kz.

Түркістан облысының прокуратурасы мемлекеттік және жекеменшік медициналық ұйымдарды тексеру барысында міндетті әлеуметтік медициналық сақтандыру жүйесінде қаржыны заңсыз алу және жұмсау деректерін анықтады.

Тексеру кезінде лицензиясыз және сапасыз консультациялық-диагностикалық қызметтер көрсету фактілері белгілі болды. Мәселен, жекеменшік клиникалардың бірінде рұқсатсыз түрлі мамандардың атынан 28 мыңнан астам жалған консультация рәсімделіп, 91 млн теңге алынған.

Аталған дерек бойынша Қылмыстық кодекстің 214-бабы аясында іс тіркеліп, тергеуді Экономикалық тергеп-тексеру департаменті жүргізді. Келтірілген залал толық өтелгендіктен, іс ақталмайтын негіздермен тоқтатылды.

Сонымен қатар, 203 млн теңгеге жалған стоматологиялық қызмет көрсету фактілері анықталды. Екі клиника үш дәрігерді формалды тіркеп, 40 мың жалған қызметті жүкті әйелдер мен балаларға көрсетілгендей етіп жүйеге енгізген.

Тексеру барысында бір дәрігердің бір күнде бірнеше клиникада бір уақытта ондаған пациентке қызмет көрсеткені тіркелген. Пациенттерден алынған жауаптар бұл мәліметтердің жалған екенін растады.

Аталған деректер бойынша Қылмыстық кодекстің 190-бабы негізінде тергеу жүргізіліп, іс сотқа жолданды.