Оқу-ағарту министрі Жұлдыз Сүлейменова Үкімет отырысынан кейін өткен баспасөз мәслихатында тілшілердің сұрақтарына жауап берді деп жазады Оinet.kz.

БАҚ өкілі министрге Нәзипа Аюбаева сияқты мамандардың қысқа мерзімде қызметтен босатылуын және бұрынғы министрлердің кадрларының алынып жатқаны жөнінде сұрақ қойды.

Жұлдыз Сүлейменова Нәзипа Аюбаеваның қызметтен өз еркімен кеткенін атап өтті:

«Ыбырай Алтынсарин атындағы ұлттық білім академиясының президенті өзінің шешімімен кетті. Бұған дейін пәндерді біріктіру реформасын тоқтаттық. Ол шешімге аталған академия президенті көнбеді және қабылданған шешім өзгермейтініне байланысты өз шешімін жасады», — деді министр.

Министрдің айтуынша, өз командасы небәрі бес адамнан тұрады, тек көмекшісі мен кеңесшілері бар. Қазіргі кадрлық өзгерістер көбінесе ұзақ жылдар бойы бір орында жұмыс істеген мамандарға қатысты. Жаңа орындарға адамдар меритократия қағидаты бойынша тағайындалады, ал кейбір мамандар өз еркімен кетіп жатады.

«Қазір өз еркімен жұмыстан кеткен 45 адам бар. Олардың ішінде екі ведомстволық бағынысты ұйымның басшысы, аппарат жетекшісі және орта білім комитетінің төрағасының орынбасары бар. Қалған мамандар жұмысын жалғастырып жатыр. Сондықтан мамандар ағынының үлкен толқынын көріп отырған жоқпын. Ал менің алдымда білім сапасын арттыру және жеке меншік мектептерді қаржыландыру сияқты маңызды міндеттер тұр. Оларды орындау үшін білікті және кәсіби мамандар қажет. Сол себепті ішкі кадрларды іздеп, біліктілерді көтермелеп тағайындауды бастадым», — деді Жұлдыз Сүлейменова.