ҚР Президенті Қасым-Жомарт Тоқаев өз Жолдауында «Қазақстандықтардың әл-ауқатының өсуі: табыс пен тұрмыс сапасын арттыру» бағыты аясында ауылдық аумақтарды дамыту мәселесіне ерекше назар аударып, Ауыл – Ел бесігі арнайы жобасын іске асыруды тапсырған болатын. Бұл бастама ауылдық елді мекендердің инфрақұрылымын жаңғыртып, тұрғындардың өмір сүру сапасын арттыруға бағытталған маңызды мемлекеттік бағдарламаға айналды.

Осыған сәйкес, еліміз бойынша әлеуметтік және инженерлік инфрақұрылымдарды жаңғыртуды қажет ететін елді мекендерді айқындап, оларға тиісті қаржы бөлу арқылы ауыл халқының әл-ауқатын көтеру көзделді. Бағдарлама ауылдық жерлердің даму деңгейін теңестіруге және өңірлер арасындағы әлеуметтік айырмашылықты азайтуға мүмкіндік берді.

Түркістан облысында аталған жоба жүйелі түрде жүзеге асырылып келеді. 2019–2025 жылдар аралығында бағдарлама аясында жалпы көлемі 136,5 млрд теңгені құрайтын 1 570 жоба іске асырылды. Оның ішінде 1 404 жоба инфрақұрылымдық нысандардың құрылыс және жөндеу жұмыстарына бағытталды.

Аталған кезеңде 2 421,3 шақырым ішкі көшелер орташа жөндеуден өтті. Сонымен қатар 38 елді мекен газбен қамтылып, 6 елді мекенде су жүйелерінің құрылыс және жаңғырту жұмыстары жүргізілді. 49 елді мекен сапалы электр энергиясымен қамтамасыз етіліп, жылу жүйелері жаңартылды.

Әлеуметтік инфрақұрылым саласында да ауқымды жұмыстар атқарылды. 166 әлеуметтік нысан салынып, күрделі жөндеуден өткізіліп, пайдалануға берілді. Атап айтқанда, 25 мәдениет үйі жаңадан салынып, 16 мәдениет үйі күрделі жөндеуден өтті. Сондай-ақ 22 спорт кешені бой көтеріп, 3 спорт нысаны жаңғыртылды, 1 стадион толық қайта жөндеуден өтті.

Білім беру және денсаулық сақтау салаларында да елеулі нәтижелер бар. 65 мектеп күрделі жөндеуден өткізіліп, 13 мектепке қосымша ғимараттар салынды. Сонымен қатар 13 фельдшерлік-акушерлік пункт жаңадан салынып, 8 денсаулық сақтау нысаны күрделі жөндеуден өтті. Бұл ауыл тұрғындарына сапалы білім мен медициналық қызметтің қолжетімді болуына ықпал етті.

Жалпы алғанда, бағдарлама нәтижесінде Түркістан облысындағы 373 елді мекенде, яғни 1 миллионнан астам халықтың өмір сүруіне қолайлы жағдай жасалды. Жобаларды жүзеге асыру барысында 11 мыңнан астам жаңа жұмыс орны ашылып, өңірдегі жұмыспен қамту деңгейі артты.

Соңғы 7 жыл ішінде облыста барлығы 260 әлеуметтік және инженерлік инфрақұрылым нысаны салынып, 2 421 шақырымға жуық жол жөнделді. Бұл жұмыстар ауыл тұрғындарының тұрмыс сапасын жақсартуға, жастардың ауылда тұрақтап қалуына және көші-қонды азайтуға ықпал етті.

Сонымен қатар, инфрақұрылымның дамуы кәсіпкерліктің өркендеуіне, шағын және орта бизнестің кеңеюіне және салықтық түсімдердің артуына жол ашты. Нәтижесінде ауылдық аумақтардың экономикалық белсенділігі артып, өңірдің жалпы даму қарқынына оң әсерін тигізді.

Қорытындылай келе, Ауыл – Ел бесігі жобасы Түркістан облысында ауылдық жерлерді жаңғыртудың тиімді құралы ретінде өз нәтижесін көрсетіп отыр. Бұл бағдарлама ауыл инфрақұрылымын дамыту арқылы халықтың өмір сапасын арттырып қана қоймай, өңірдің тұрақты әлеуметтік-экономикалық дамуына да берік негіз қалыптастыруда.