Түркістан облысында орман және дала өрттерімен күрес, сондай-ақ олардың алдын алу шаралары жүйелі түрде күшейтілуде. Өңірде төтенше жағдайлардың алдын алу мақсатында күштер мен құралдардың дайындық деңгейін арттыруға бағытталған «Өрт-2026» республикалық оқу-жаттығуы 28–29 мамыр күндері өткізілді.

Аталған оқу-жаттығу өрт қауіпті кезеңде жедел әрекет ету алгоритмін пысықтауға, қызметтердің өзара үйлесімін күшейтуге және табиғи өрттердің алдын алу шараларын жетілдіруге бағытталды.

Облыста орман, дала және егістік алқаптарында өрттің таралуын болдырмау үшін минералданған жолақтар жүргізу жұмыстары жоспарлы түрде атқарылуда. Биыл бұл бағытта жалпы ұзындығы 9 602,49 шақырымды құрайтын жоспар бекітіліп, оның бірінші кезеңі 100 пайыз орындалды.

Өңір басшысы Нұралхан Көшеров аппарат мәжілісінде жауапты органдарға жұмыстарды уақытылы әрі сапалы орындауды, өрт қауіпті маусымда барлық күш пен техниканың толық дайын болуын тапсырды.

Облыстық Төтенше жағдайлар департаментінің мәліметіне сәйкес, орман және дала өрттерін сөндіруге 340 жеке құрам, 70 бірлік техника және 1 тікұшақ жұмылдырылған. Әуе техникасымен су алу үшін 10 арнайы орын белгіленген.

Сонымен қатар облыстағы 12 орман шаруашылығы мекемесі өрт маусымына толық дайындыққа келтірілген. Жыл басынан бері 95 әкімшілік шара қолданылып, өрт қауіпсіздігі талаптарының сақталуы қатаң бақылауға алынған.

Өңірде жүзеге асырылып жатқан «Ауыл құтқарушылары» бағдарламасы ауылдық аумақтардың өрт қауіпсіздігін күшейтуге айтарлықтай үлес қосуда. Бағдарлама аясында 10 өрт сөндіру пункті ашылып, бүгінге дейін олардың көмегімен 25 өрт және жану жағдайы жедел түрде сөндірілген.

Бұл бастама шалғай елді мекендердің қауіпсіздігін арттырып, төтенше жағдайларға жергілікті деңгейде жедел әрекет ету жүйесін қалыптастыруға мүмкіндік беріп отыр.

Өрт қауіпсіздігін қамтамасыз ету бағытындағы атқарылып жатқан жұмыстар елімізде жүзеге асырылып жатқан «Қауіпсіз ел ұлттық жобасы» мақсаттарымен тікелей сабақтас.

Аталған ұлттық жоба қоғамдағы қауіпсіздікті күшейтуге, төтенше жағдайлардың алдын алуға, азаматтардың өмірі мен мүлкін қорғауға бағытталған. Осы тұрғыдан алғанда, минералданған жолақтарды салу, техникалық жарақтандыруды күшейту, ерікті құрылымдарды дамыту және ерте анықтау жүйелерін енгізу – ұлттық жобаның негізгі қағидаттарымен толық сәйкес келеді.

Яғни, өрт қауіпсіздігін арттыру шаралары тек табиғи апаттардың алдын алу ғана емес, сонымен қатар қоғамның жалпы қауіпсіздік деңгейін көтерудің маңызды бөлігі болып табылады.

Өңірде өртке қарсы материалдық-техникалық база күшейтілген. Орман қоры аумақтарында 39 өрт сөндіру автокөлігі, 12 трактор, 25 патрульдік көлік, 52 тіркеме, 71 қосалқы техника және 1552 өрт сөндіргіш құрал бар. Сонымен бірге 2 648 адамнан тұратын 14 ерікті өрт сөндіру құрылымы жұмыс істеуде.

«Сайрам-Өгем» ұлттық табиғи паркінде өртті ерте анықтау жүйелерін орнату жұмыстары жүргізілуде. Бұл технологиялар табиғи өрттердің алдын алуда маңызды рөл атқарады.

Түркістан облысында өрт қауіпсіздігін қамтамасыз ету бағытындағы кешенді шаралар тұрақты түрде жалғасуда. «Өрт-2026» оқу-жаттығуы, техникалық дайындық, профилактикалық жұмыстар және ерікті құрылымдардың дамуы өңірдің қауіпсіздік деңгейін арттыруға ықпал етуде.

Жалпы алғанда, атқарылып жатқан жұмыстар «Қауіпсіз ел ұлттық жобасы» аясындағы азаматтардың қауіпсіздігін қамтамасыз ету, тәуекелдерді азайту және төтенше жағдайлардың алдын алу мақсаттарымен толық үндесіп отыр.