Цифрлық технологиялар медицина саласына да дендеп еніп, медициналық көмекті ұйымдастырудан бастап, көрсетілген қызметтерді бақылау мен қаржыландыруға дейінгі үдерістерді жаңғыртуға жол ашуда. Мұндай шешімдер медициналық қызметтің тиімділігін арттырып қана қоймай, азаматтардың өз құқықтары мен алған қызметтері туралы ақпаратты бақылауына мүмкіндік береді. 

Осы орайда Шымкентте Әлеуметтік медициналық сақтандыру қорының Орталық аппараты өкілдері қаланың медицина қауымдастығымен кездесті. Кездесу барысында  міндетті әлеуметтік медициналық сақтандыру жүйесін «МӘМС 2.0» аясында трансформациялаудың негізгі бағыттары, сондай-ақ Qalqan бірыңғай цифрлық платформасының мүмкіндіктері таныстырылды.

МӘМС жүйесін трансформациялау медициналық көмекті басқару тәсілдерін жетілдіруді көздейді: медициналық қызметтерді қаржыландыруда шығындардың тиімділігіне, тәуекелдер мен нәтижелерді басқаруға басымдық беріледі. 

Басты  өзгерістердің бірі — алдын ала бақылауды күшейту. Енді медициналық қызметтер туралы деректер төлем жүргізілгеннен кейін емес, шот қалыптастыру кезеңінде автоматты түрде тексеріледі. Бұл төлем жасалғанға дейін техникалық қателер мен сәйкессіздіктерді анықтауға, медициналық ұйымдардың қаржылық тәуекелдерін төмендетуге,  Қормен есеп айырысудың ашықтығын арттыруға мүмкіндік береді.

Қор өкілдерінің айтуынша, жаңа модельдің негізгі цифрлық құралдарының бірі — Qalqan платформасы. Ол пациенттер туралы мәліметтерді тексеру, шоттар мен көрсетілген медициналық қызметтер актілерін қалыптастыру сияқты бірқатар процесті автоматтандырады.

Цифрлық шешімдер азаматтардың қоғамдық бақылауға қатысу мүмкіндігін  кеңейтеді. Азаматтар өз атына көрсетілген медициналық қызметтер туралы ақпаратты тексере алады. Егер іс жүзінде көрсетілмеген медициналық қызмет тіркелгені анықталса, бұл туралы тиісті органдарға хабарлай алады.

Кездесу барысында медициналық ұйымдардың басшылары жаңа модельді іске асыруға қатысты сұрақтарын қойып, өз ұсыныстарын білдірді.

Бүгінде Шымкентте МӘМС жүйесі аясында 174 медициналық ұйым қызмет көрсетеді. Оның 34-і — мемлекеттік, қалғаны — жекеменшік медициналық ұйымдар. Qalqan платформасын қаладағы медициналық ұйымдарға енгізу кезең-кезеңімен жүзеге асырылуда.