Шымкент қаласы Полиция департаментінде жас қызметкерлердің салтанатты Ант қабылдау рәсімі өтті. Қызмет жолын бастаған жас мамандар Қазақстан Республикасына адал қызмет етуге, Конституция мен заң талаптарын сақтауға, азаматтардың құқықтары мен бостандықтарын қорғауға ант берді. Бұл рәсім олардың ішкі істер органдарындағы қызметіне қадам басып қана қоймай, қоғам алдындағы жауапкершілікті сезінуінің де маңызды кезеңі саналады.

Салтанатты іс-шараға Полиция департаментінің басшылығы мен ішкі істер органдарының ардагерлері қатысты. Жиын барысында жас қызметкерлерге қызметтік міндеттерін абыроймен атқару, тәртіпті сақтау, кәсіби міндеттерге адал болу және халықтың сенімін ақтау қажеттігі айтылды. Ардагерлер құқық қорғау саласындағы тәжірибесімен бөлісіп, полиция қызметінде заңдылық пен жауапкершіліктің орны ерекше екенін атап өтті.

Полиция қызметкері үшін Ант қабылдау – жай ғана салтанатты рәсім емес. Ол азаматтардың қауіпсіздігін қамтамасыз етуге, қоғамдық тәртіпті қорғауға және заң талаптарының орындалуына жауапты болуды білдіреді. Қызмет барысында мамандар түрлі жағдайға тап болады. Мұндай кезде заңды басшылыққа алып, әр азаматтың құқығына құрметпен қарау, шешім қабылдауда әділдік таныту және қызметтік әдепті сақтау маңызды.

Мемлекет басшысы айқындаған «Заң мен тәртіп» қағидатының жүзеге асуында құқық қорғау органдары қызметкерлеріне үлкен міндет жүктеледі. Қоғамдық орындардағы тәртіпті сақтау, құқық бұзушылықтардың алдын алу, азаматтардың заңды мүдделерін қорғау және тұрғындардың қауіпсіздігіне қатер төндіретін жағдайларға дер кезінде әрекет ету – полиция қызметінің негізгі бағыттары. Бұл міндеттерді орындау үшін кәсіби біліктілікпен қатар, адалдық пен жауапкершілік те қажет.

Заң үстемдігі азаматтардың құқықтары қорғалып, заң талаптары баршаға бірдей орындалған кезде нығаяды. Сондықтан полиция қызметкерінің әрбір әрекеті заң шеңберінде болуы және тұрғындардың сенімін қалыптастыруға ықпал етуі тиіс. Халықпен ашық қарым-қатынас орнату, азаматтардың өтінішіне бейжай қарамау және қызметтік міндеттерді мінсіз орындау да осы жауапкершіліктің құрамдас бөлігі.

 «Заң мен тәртіп» қағидаты әр қызметкердің өз міндетіне адал қарап, заң талаптарын бұлжытпай орындауынан басталады.