«Ақыл жастан...» демекші шымкенттік жас кәсіпкер  Мыңжасар Жорабекұлы зеректілігінің арқасында ерекше кәсіп бастаған. Ол зертханалық стенд жасап, өз кәсібін өркендетті. Яғни 2017 жылы Зертханалық стенд жасаумен айналысаты «Automation ES» ЖШС-ның негізін қалады.  

Кәсіпкердің негізгі мамандығы – инженер. Кәсіпорын күні бүгінге дейін 80-нен астам  түрлі сынамалы зертханалық қондырғы құрастырған. Бизнесті жүргізуге қаражат алғашында жеке капитал есебінен жұмсалған. Кезінде мемлекеттік бағдарламасы бойынша 3 миллион теңге грант ұтып алған. Грант қаржысын стендке қажетті бөлшектер сатып алуға жаратады. Зертханалық қондырғыларды құрастыруға техникаға әуесі бар жастар көмектеседі. Сол еңбегі үшін оларға тиісті еңбекақы төленеді.  «Негізінде электрмонтажды үйреткенім үшін олар маған ақы төлеу керек болса, менде керісінше. Өз елімнің патриоты болғандықтан ізімізді басып келе жатқан жастардың техникаға білікті, бәсекеге қабілетті болғанын қалаймын» - дейді кәсіпкер.

«Automation ES» өнімдері арнайы цехта жасалады. Микросхемаларды да өздері аппарат арқылы қолдан істейді. Дайын өнімнің 70-80 пайызға жуығы қазақстандық бөлшектерден тұрса, қалғаны шетелден әкелінеді. Зертханалық қондырғылармен жоғары және арнаулы оқу орнының студенттері жұмыс істейтіндіктен өнімнің сапасына және қауіпсіздігіне мән беріледі. Стенд құрастырылып болған соң сапасы білікті мамандар тарапынан жіті тексеріледі. Заманауи зертханалық қондырғылар өзімізден бөлек шетелдік ұйымдардың да аса жоғары қызығушылығын тудырған. Сондықтан Өзбекстандағы Ислам Каримов атындағы Ташкент мемлекеттік техникалық университеті осындай 8 стендке тапсырыс берген. Сонымен бірге Тәжікстан елімен де отандық өнімді сатып алу бойынша компания тарапынан келіссөздер жүргізілуде. Және де БҰҰ-ның Қазақстандағы даму жобасы ұйымына, Кентау трансформатор зауытына және М.Әуезов атындағы ОҚУ-ға да «Automation ES» қондырғылары қойылды. Шымкентте өндірілген зертханалық стендтер колледждер арасында өткізілетін халықаралық World Skills Kazakhstan көрме байқауында төрт жыл қатарынан жүлделі орындар алып келеді.

Зертханалық стенд – белгілі бір ғылыми немесе техникалық процесті түсіндіруге, модельдеуге және тәжірибе жасауға арналған арнайы құрал. Мектеп, колледж, университет зертханаларында, өндірістік мекемелерде, энергетика, машина жасау, электроника, физика, химия, биология сияқты салаларда кеңінен қолданылады. Сондықтан стенд жасау кәсібі – тек жабдық шығару емес, білім мен ғылым арасындағы байланысты қамтамасыз ететін стратегиялық сала. Бұл кәсіптің ең негізгі ерекшелігі – техникалық дәлдікті, ғылыми түсінікті және инженерлік шығармашылықты ұштастыруда. Әрбір зертханалық стенд нақты пәннің ерекшелігіне қарай жобаланады. Мысалы, электр тізбектерін үйренуге арналған стендте түрлі датчиктер, релелер, мультиметр қосқыштары орналасса, механика пәніне арналған стендте айналу моментін, энергияны немесе үйкеліс күшін өлшейтін құрылғылар болады. Демек, стенд жасаушы кәсіпкер ғылыми процестерді терең түсініп қана қоймай, оларды ыңғайлы және қауіпсіз түрде студентке жеткізетін техникалық құрылғы жасай білуі керек.