Шымкент қаласында «Рухани құндылықтар және патриоттық тәрбие» бағытында маңызды істер жүйелі түрде жүзеге асырылуда. 

Соның бір айқын көрінісі ретінде ҚМДБ Төрағасы, Бас мүфти Наурызбай қажы Тағанұлының Бағдарлық баяндамасы аясында Шымкент қаласы, Абай ауданы, Кенесары хан мешітінде түркі халықтарының ұлы рухани ұстазы Қожа Ахмет Ясауи атындағы арнайы кітапхананың ашылуы ерекше орын алады.

Бұл кітапхананың негізгі мақсаты – мешіт жамағатына қазақ халқының ғасырлар бойы қалыптасқан дәстүрлері мен салт-дәстүрін, тәлім-тәрбиенің негізін қалаған рухани құндылықтарды кеңінен насихаттау болып табылады. Сонымен қатар, бұл орын діни сауаттылықты арттыру, рухани тәрбие беру және дұрыс діни ақпаратты тарату қызметін атқарады. Кітапхананың қорында негізінен Қазақстан мұсылмандары діни басқармасына қарасты дін ғалымдарының еңбектері мен кітаптары жинақталған. Сонымен бірге, заманауи технологияны қолданып, оқырмандарға ыңғайлы болу мақсатында электронды кітапхана жүйесі де енгізілген.

Бұл шара қазақ халқының рухани болмысын, оның ішінде ислам діні мен ұлттық салт-дәстүрлерді ұрпақ санасына сіңірудің маңызды кезеңі ретінде бағаланады. Қазақстан Республикасы Дін істері комитеті мен Мұфтияттың сараптамасынан өткен, дін мен дәстүрге қатысты құнды кітаптар мен басылымдар – «Иман» журналы, «Мұнара» газеті сынды төл басылымдар да кітапхана қорын толықтырып отыр. Мұндай рухани және мәдени ақпарат көздерінің қолжетімді болуы жастарды патриоттық рухта тәрбиелеуге, ұлттық сананы нығайтуға елеулі үлес қосады.

Шымкент қаласында осындай рухани орталықтардың ашылуы жалпы қала тұрғындарының, әсіресе жастардың қазақ халқының рухани құндылықтары мен ұлттық мәдениетін терең түсінуіне, ұлт тарихын құрметтеуге және тәлім-тәрбие негіздерін бойына сіңіруге бағытталған жүйелі жұмыс пен мемлекеттік, қоғамдық ұйымдардың бірлескен күш-жігерінің жемісі болып табылады. Бұл бағыттағы жұмыстар қаладағы патриоттық тәрбие мен рухани жаңғыруды одан әрі дамытуға тың серпін бермек.

Жалпы, қазақ халқының рухани құндылықтарын насихаттау және патриоттық тәрбие беру ісінде кітапханалар мен мешіттер, мәдени орталықтар мен білім беру ұйымдарының рөлі айрықша. Олар ұрпақтар сабақтастығын қамтамасыз етіп, ұлттық болмысты сақтауда маңызды институттарға айналуда. Шымкенттегі Қожа Ахмет Ясауи атындағы кітапхананың ашылуы осы міндеттерді жүзеге асырудағы маңызды қадам ретінде бағалануда және оның әрі қарай дамуы мен қызметін кеңейту жоспарлануда.