Алматы қаласында 21 наурызға қараған түні болған жол апатының басты күдіктісі тергеу изоляторына жеткізілді. Бұл туралы қалалық полиция департаменті хабарлады, деп жазады  Оinet.kz.

Бұған дейін жүргізуші медициналық мекемеде тексеруден өткен еді. Полицияның мәліметінше, ZEEKR автокөлігінің жүргізушісі қылмыстық іс аясында әрі қарай күзетпен ұстау үшін тергеу изоляторына ауыстырылған.

Жол апаты Әл-Фараби даңғылы бойында болды. ZEEKR көлігінің жүргізушісі қарсы жолаққа шығып кетіп, Mercedes автокөлігімен соқтығысқан. Оқиға салдарынан Mercedes көлігінің жүргізушісі мен екі жолаушысы оқиға орнында қаза тапты.

Аталған дерек бойынша ҚР Қылмыстық кодексінің 345-бабының 4-бөлігі бойынша қылмыстық іс қозғалған. Бұл бап бойынша кінәлі тұлға 10 жылға дейін бас бостандығынан айырылуы мүмкін.