Бүгінде мемлекеттік қызметтердің басым бөлігі электрондық форматқа көшіп, азаматтардың көптеген мәселені үйден шықпай-ақ шешуіне мүмкіндік беріп отыр. Алайда цифрлық сервистердің мүмкіндігін толық пайдалану үшін қажетті дағдыларды меңгеру маңызды. Осы бағытта «Азаматтарға арналған үкімет» мемлекеттік корпорациясы қазақстандықтардың цифрлық сауаттылығын арттыруға арналған оқыту жұмыстарын тұрақты түрде жүргізіп келеді.

Бұл бағытта Шымкент қаласы жоғары белсенділік танытып, оқыту ауқымы бойынша үздік бестіктің қатарында бірінші орынға ие болды. 

Қазіргі таңда Мемлекеттік корпорацияның еліміздегі фронт-офистерінде 20 оқыту сыныбы жұмыс істейді. Мұнда мамандар қызмет алушыларды заманауи цифрлық сервистердің мүмкіндіктерімен таныстырып, мемлекеттік қызметтерді электрондық форматта өз бетінше алу жолдарын үйретеді. Сабақ барысында азаматтарға қажетті қызметті онлайн іздеу, электронды өтініш беру, цифрлық құжаттарды пайдалану және басқа да сервистермен жұмыс істеу тәртібі түсіндіріледі.

Жыл басынан бері мұндай оқыту сабақтарына 6 мыңнан астам адам қатысқан. Қатысушылар саны бойынша ең белсенді бес өңірдің үлесіне олардың жартысынан астамы тиесілі. Сол көшбасшы өңірлердің қатарында Шымкенттің бірінші орын алуы қала тұрғындарының цифрлық сауаттылықты арттыруға деген сұранысы мен белсенділігін айқын аңғартады.

Мамандар оқыту барысында азаматтарға тек теориялық ақпарат беріп қана қоймай, қажетті қызметтерді өз бетінше алуға қажетті практикалық дағдыларды қалыптастыруға көмектеседі. Бұл әсіресе электрондық қызметтерді пайдалануда тәжірибесі аз тұрғындар үшін тиімді. Сабақтан кейін азаматтар көптеген мемлекеттік қызметті маман көмегінсіз-ақ онлайн түрде рәсімдей алады.

Шымкент қаласында цифрлық сауаттылықты арттыруға бағытталған сабақтар әр сәрсенбі және жұма күндері Халыққа қызмет көрсету орталықтарында өткізіледі. Оқу тегін және оған цифрлық сервистердің мүмкіндіктерін меңгергісі келетін кез келген азамат қатыса алады.

Шымкенттің бұл бағытта көш бастауы цифрлық қызметтерді дамыту ғана емес, тұрғындардың жаңа технологияларды қабылдау және қолдану белсенділігі де маңызды екенін көрсетеді.