Кәсіпкер болуға әркімнің-ақ бар таласы. Ия қазіргі дамыған заманда көптеген адамдар бір жалақыға қарап отырмай өз ісін бастауды қалайды. Бұл мемлекет үшін де тиімді. Өйткені кәсіпкерлік саласы дамыса елдің экономикасы, әлеуметтік жағдай да арта  түсетіні анық. Сондықтан мемлекет  тарапынан қазіргі таңда кәсіпкерлікті дамытуға, бизнес ашуға үлкен қолдау білдіріп келеді. Осы салада  түрлі бағдарламалар жүзеге асырылуда. Айталық  «2021-2025 жылдарға арналған  кәсіпкерлікті дамыту жөніндегі ұлттық жобасы». 

   Жобаның шарапатын көргендердің бірі  Шымкент қаласының тұрғыны Ұлжалғас Керімқұлова. Ұлжалғасқа өткен жылы желтоқсан айында 200 АЕК  мемлекеттік грант тағайындалған. Ол 29 жасқа дейінгі санат бойынша үміткер ретінде қатысып, тиісті құжаттарын өткізіп, комиссия мүшелерінің алдында бизнес жоспарын сәтті қорғаған. Алған қаражатына әсемдік салонына қажетті бірнеше құрал-жабдық сатып алып, бүгінде қыз-келіншектерге қызмет көрсетіп, табыс тауып отыр. «Аз ақшамен де кәсіп бастауға болады. Бастысы- ниет болу керек. Қазір осы кәсіптің арқасында аяққа нық тұрып келемін. Мұнымен тоқтап қалмай, кәсібімді дамытсам деймін», - дейді жас кәсіпкер. 

Қазіргі қоғамда сұлулық индустриясы ең жылдам дамып келе жатқан салалардың бірі болып отыр. Адамдар өзін күтіп, тартымды көрінуге, сыртқы бейнесін жетілдіруге ерекше мән береді. Осы қажеттілік әсемдік салондарының кәсібін нарықтағы ең сұранысқа ие бағыттардың біріне айналдырды. Әсемдік салоны – тек шаштаралық немесе косметологиялық қызмет көрсететін орын емес, ол адамның өз-өзіне сенімділігін арттырып, жаңа бейне қалыптастыратын орталық. Әсемдік салоны бизнестің артықшылығы – оның тұрақты әрі кең аудиторияға арналған қызметінде. Жас та, үлкен де, ер адам да, әйел адам да бұл қызметке жүгінеді. Шаш қию, маникюр, педикюр, бет күтімі, массаж, визаж, қас пен кірпік қызметтері – барлығы күнделікті қажеттілікке айналған. Сондықтан бұл салада қызметтің тоқтауы сирек кездеседі, сұраныс жыл он екі ай тұрақты сақталады.

Әсемдік салондары тек қызмет көрсету орны ғана емес, адамдардың көңіл күйін көтеретін, өз-өзіне сенімділігін арттыратын әлеуметтік маңызды кеңістікке айналды. Әдемі шаш үлгісі, дұрыс жасалған макияж немесе күтімді тері – адамның өзін жақсы сезінуіне, қоғамда белсенді болуына әсер етеді. Демек, бұл сала психологиялық тұрғыдан да маңызды рөл атқарады.

Әсемдік салоны кәсібі – тек табыс әкелетін бағыт қана емес, адамның сұлулығына, өзін-өзі бағалауына, өмір сапасына әсер ететін маңызды бизнес. Бұл салада шеберлік, жаңашылдық және клиентке деген құрмет сияқты қасиеттерді ұштастырған кәсіпкерлер әрдайым өз орнын табады. Сұлулыққа деген сұраныс ешқашан бәсеңдемейді, сондықтан әсемдік салондарының болашағы да зор әрі тұрақты.

 «2021-2025 жылдарға арналған  кәсіпкерлікті дамыту жөніндегі ұлттық жобасының»  мәні - қалайтындарға кәсіпкерлік негіздерді оқыту, содан кейін өз ісін бастауды қаржыландыру. Жобаға қатысушылар алдын-ала мамандандырылған оқудан немесе жұмыспен қамту орталықтары ұйымдастыратын арнайы оқу курстарда («Атамекен» палатасында) кәсіпкерлік негіздері бойынша оқудан өтуі қажет; оқу аяқтағаны туралы сертификат алғаннан кейін, қатысушылар болашақ қызметінің, кәсіп-жобасын қорғауға міндетті; өз кәсібін бастауға арналған бастапқы капитал ретінде, сәтті қорғалған адамдарға өтеусіз мемлекеттік грант беріледі; бір жыл ішінде жаңадан бастаған кәсіпкерді, аймақтық кәсіпкерлер палатасы қадағалап, кәсіптік-жобаны жүзеге асыруға көмектеседі.

Мемлекеттік грант - кәсіпті дамытуға арналған несие емес екенін, есте ұстаған жөн. Оны қайтарудың және пайыздарды төлеу қажет емес. Ақша бөлудің бірден-бір шарты – қаражатты, өз ісін ұйымдастыру мақсаттына пайдалану.