Шымкенттік Камшат өткен жылы 29 жасқа дейінгі санат бойынша мемлекеттен қайтарымсыз грант алып, жеке кәсібін бастағандардың бірі. «2021-2025 жылдарға арналған  кәсіпкерлікті дамыту жөніндегі ұлттық жобасына қатысып, бизнес жобасы мақұлданған Камшат грант қаржысына кондитерлік өнімдерді дайындауға қажетті құрал-жабдықтар сатып алған. Қосымша өз қаражаты есебінен де қажетті заттарын түгендеп, бүгінде тапсырыспен кондитерлік тәттілер дайындап, саудалауда. Заман талабына сай әлеуметтік желілер арқылы да тұрғындардан тапсырыстар қабылдап отыр.

- Менің негізгі мамандығым - мұғалім. Бірақ мамандығыммен көп жұмыс істеген жоқпын. Кондитерлік өнімдер дайындау хоббиім десем де болады. Сол хоббиді нақты кәсіпке айналдыру туралы көп ойландым. Тәуекелге бел буып, мемлекеттік грантқа өтінім бердім. Жобамды қорғап, нәтижесінде маған грант қаражаты тағайындалды. Өкінбеймін. Тәттілерге тұрғындардың сұранысы жаман емес,- дейді грант иесі.

Кондитерлік өнімдер өндірісі – талғам мен талпынысты, ықылас пен еңбекті талап ететін ерекше кәсіп. Адамға шаттық сыйлайтын тәтті тағамдар қай кезеңде де сұраныстан түскен емес. Сондықтан да кондитерлік бизнес – тұрақты табыс көзіне айналатын, шығармашылықты қатар талап ететін болашағы зор бағыт. Бұл салада ең басты құндылық – сапалы өнім мен тұтынушының сенімі.

Кондитерлік кәсіпті бастау үшін алдымен өнім түрін анықтау маңызды. Қазақ қоғамында той-томалақ, мерекелік шаралар көп болғандықтан, торт, кекс, пирожный, печенье сияқты үй жағдайында дайындалатын тәттілерге сұраныс өте жоғары. Әсіресе, табиғи өнімдерден жасалған, дәмі ерекше, сәнделуі көз тартатын авторлық торттар нарықта жоғары бағаланады. Қазіргі тұтынушылар сапаға да, өнімнің сыртқы көрінісіне де мән береді. Сондықтан кондитерлердің шеберлігі мен қиялы үлкен рөл атқарады.

Бұл кәсіптің тағы бір артықшылығы – бастапқы шығынның көп талап етілмеуі. Кәсіпкер аз көлемнен бастап, әлеуметтік желі арқылы тапсырыс қабылдап, біртіндеп кәсібін кеңейте алады. Тұтынушылармен тікелей байланыс орнату, олардың пікірлерін тыңдау қызмет сапасын жақсартып, тұрақты клиенттік базаны қалыптастыруға мүмкіндік береді. Сонымен қатар, мемлекет тарапынан да үй кәсіпкерлерін қолдайтын гранттар мен жеңілдетілген несиелер қарастырылған. Бұл жас кондитерлерге өз кәсібін дамытуға жол ашады.

Кондитерлік өнімдер бизнесі тек табыс көзі ғана емес, адамның шығармашылық мүмкіндігін аша түсетін кәсіп. Әрбір торт немесе тәтті – бір туынды, шебердің қолтаңбасы. Туған күндік торттардың ерекше безендірілуі, мерекелік тәтті сеттер, ұлттық оюмен безендірілген қантты печеньелер – мұның бәрі кондитердің қиялы мен еңбекқорлығын көрсетеді. Жұмыстың жауапкершілігі де жоғары: тағам гигиенасы, ингредиент сапасы, сақтау талаптары қатаң сақталуы тиіс.

Айта кетейік, «2021-2025 жылдарға арналған  кәсіпкерлікті дамыту жөніндегі ұлттық жобасы».  Ұлттық жоба бүгінде көптеген азаматтарға демеу болып, іс бастауға, кәсіпкер атануға септігін тигізуде. Ал мұндай кәсіпкерлер қатарының артуы шағын және орта бизнестің өркендеуіне жол ашуда. Жобаға қатысушылар алдын-ала мамандандырылған оқудан немесе жұмыспен қамту орталықтары ұйымдастыратын арнайы оқу курстарда (оның ішінде «Атамекен» палатасында) кәсіпкерлік негіздері бойынша оқудан өтуі қажет; оқу аяқтағаны туралы сертификат алғаннан кейін, қатысушылар болашақ қызметінің, кәсіп-жобасын қорғауға міндетті; өз кәсібін бастауға арналған бастапқы капитал ретінде, сәтті қорғалған адамдарға өтеусіз мемлекеттік грант беріледі; бір жыл ішінде жаңадан бастаған кәсіпкерді, аймақтық кәсіпкерлер палатасы қадағалап, кәсіптік-жобаны жүзеге асыруға көмектеседі.

Мемлекеттік грант - кәсіпті дамытуға арналған несие емес екенін, есте ұстаған жөн. Оны қайтарудың қажеті жоқ, пайыздарды төлеу қажет емес. Ақша бөлудің бірден-бір шарты – қаражатты, өз ісін ұйымдастыру мақсаттына пайдалану. .  Гранттар - тұтынушылық мақсаттарға, кредит қарыздарын өтеуге, жылжымайтын тұрғын үй сатып алуға және салуға, жер учаскелерін сатып алуға, акцизделетін өнімдердің өндірісіне және жалдау ақысы ретінде берілмейді.