Мемлекет кәсіп бастаймын деген азаматтарға қайтарымсыз гранттар беруде. Қайтарымсыз гранттар экономикалық қана емес, әлеуметтік маңызы бар жобаларға да беріліп жатады. Мысалы, қолөнерді дамыту, ауыл шаруашылығы, сервис түрлері, шағын цехтар, сұлулық салондары, кондитерлік бағыттар, тігін шеберханалары – мұның бәрі халыққа қызмет көрсетіп, өңірлік экономиканы жандандыратын бизнес түрлері. Осы салалардың дамуы жұмыс орындарының ашылуына, жергілікті өнім өндірісінің көбеюіне, ауыл мен қала арасындағы экономикалық теңгерімнің қалыптасуына ықпал етеді. Қайтарымсыз гранттар – азаматтардың кәсібін бастауына жол ашатын, әлеуметтік жағдайды жақсартатын, экономикалық өсімді қолдайтын маңызды мемлекеттік қолдау түрі. Бұл тек қаржылай көмек емес, адамның өзіне деген сенімін арттыратын, жаңа мүмкіндіктерге жол көрсететін үлкен бастама. Әрбір табысты кәсіп шағын қадамнан басталады, ал сол қадамға алғашқы серпінді дәл осы қайтарымсыз грант береді.

Бүгінде қайтарымсыз грант алып жатқан азаматтар аз емес. Солардың бірі - Шымкент қаласының тұрғыны Бекжан Ерназаров.  Ол 2020 жылдың шілде айында «Бастау бизнес» кәсіпкерлік негіздері жобасымен оқып, сертификат алып, қайтарымсыз мемлекеттік грантқа құжат өткізген.  Сонымен қатар, өз ізденісінің нәтижесінде бизнес жобасын сәтті жетілдіріп, қыркүйек айында «Бизнестің жол картасы 2020» бизнесті қолдау мен дамытудың мемлекеттік бағдарламасы шеңберінде грантқа ие болды. Жас шебер қазіргі таңда сандық шеберханасын ашып, тапсырысқа заманауи үлгіде түрлі ою-өрнектелген сандықтарды, қыз-жасау және т.б заттарды жасауды қолға алған. 

Бекжан бұл шеберлікті өзі үйренген.  «Өзіме ұнайтын іспен айналысып, тапсырыс жасаушылардың көңілінен шығуға тырысамын. Әр қазақтың үйінде осындай ою-өрнегі бар сандықтардың болуы керек. Себебі сандықтың қазақ халқы үшін орны ерекше, сандықтың өзіндік киесі бар. Жиһаздың неше  түрі шықса да кәдімгі қазақтың сандығына ештеңе жетпейді. Әрине қазіргі заманға сай дизайнін өзгертіп, сәндейміз. Тапсырыстар түсіп жатыр. Жұмысым жүруде. Осы ретте біз секілді қарапайым тұрғындарға қолдау көрсетіп, өз кәсібін ашуға көмек беріп отырған мемлекетке, басшыларға алғысымды айтамын» дейді жас кәсіпкер.  Алдағы уақытта өз ісін дамытып, сапалы жиһаздарды жасауды да жоспарлап отыр.

Жиһаз – адамзат өмірінің ажырамас бөлігі. Үйіміздегі жайлылық, кеңсенің жұмысқа қолайлы болуы немесе қоғамдық орындардың тартымдылығы – барлығы сапалы және ыңғайлы жиһазға байланысты. Осы тұрғыдан алғанда, жиһаз кәсібі тек тұрмыстық қажеттілік емес, сонымен бірге өнер мен кәсіпкерліктің тоғысқан нүктесі. Жиһаз жасау – көне кәсіптің бірі. Бұрынғы заманнан-ақ ағаш шеберлері тұрмыстық бұйымдар жасап, қоғамда құрметті орын алған. Қазіргі таңда бұл сала заманауи технологиялармен толықтырылып, үлкен өндіріс көзіне айналды. Қазақстанда да жиһаз өндірісі мен сату кәсібі жылдан жылға дамып келеді. Жиһаз кәсібі бірнеше бағыттан тұрады: үй жиһазы (диван, төсек, үстел), кеңселік жиһаз, оқу орындарына арналған жабдықтар, тапсырыспен жасалатын дизайнерлік жиһаз түрлері. Бұл салада табысқа жету үшін шеберлікпен қатар нарықты түсіну, тұтынушы талғамына бейімделу маңызды. Сонымен қатар, жиһаз кәсібі – жастарға өзін-өзі жұмыспен қамтуға үлкен мүмкіндік беретін сала. Шағын цех ашып, тапсырыспен жиһаз жасап, біртіндеп өз брендіңді қалыптастыруға болады. Осы салада еңбек етіп жүрген азаматтардың көбі – кәсіпкерлікпен айналысатын, табанды, ізденімпаз жандар.

Жиһаз кәсібі – қолөнер, дизайн, технология және бизнес біріктірілген, әлеуеті жоғары сала. Қазіргі таңда бұл кәсіпке сұраныс жоғары, сондықтан да шеберлер мен кәсіпкерлер үшін үлкен мүмкіндік алаңы болып отыр.