Діни басқарма Әбдуғаппар Смановтың жаназасына қатысты пікір білдірді

Oinet.kz 03-07-2020

Кешеден бері әлеуметтік желіде белгілі уағызшы Әбдуғаппар Смановтың жаназасына жиналған көпшілік туралы видео тараған болатын.  Осыған байланысты Қазақстан мұсылмандары діни басқармасы төрағасының орынбасары, наиб мүфти Ершат Оңғаров орталық коммуникациялар қызметінде өткен брифинг барысында пікір білдірді, деп хабарлайды Oinet.kz. 

image.png

- Иә, өкінішке қарай ондай жағдай болды. Індет кезінде діни рәсімді өткізуге байланысты Қазақстан мұсылмандары діни басқармасы 18 маусымда нұсқаулық жариялаған болатын. Ал 1 шілде күні Сарыағаш ауданында болған жағдай марқұм Әбіғаппар Сманов мырзаның халық арасындағы беделіне, жақсы көретін шәкірттерінің көптігіне байланысты болған. Жаназадан бұрын, марқұм қайтыс болған күні Түркістан облысының бас имамы Мұсабек Ақтамберді ҚМДБ нұсқаулығы шыққанын, санитарлық нормаларды сақтау керектігін және жаназа намазы барлық адамға бірдей парыз еместігін айтып, видеомәлімдеме жасаған еді. Алайда, жаназаға сол ауылдың, көршілес ауылдың азаматтарының келіп қатысқаны белгілі болды", - деді ол. 

Ал бас мүфти Наурызбай қажы Тағанұлы Қазақстан мұсылмандары діни басқармасы шығарып жатқан пәтуалар қасиетті Құранға, пайғамбар сүннетіне және біздің ата-баба дәстүрімізге сүйене отырып жасалатынын білдірді.

- Шыққан пәтуа ханға да, қараға да бірдей. Мұны барлығымыз орындауымыз керек. Әрине, біздің жақсы кісілеріміз, жақындарымыз болады. Бірақ, пәтуа бұдан жоғары. Пәтуаға бағыну шарт. Ал жаназа намазы - кифая. Яғни, бірнеше адамның орындауымен қалған халықтың мойынынан түсетін құлшылық. Қазіргі жағдайда, індет жаппай тарап жатқан кезде біз адам өміріне қауіп төндірмеуді ойлауымыз керек. Ол жерге бір ауырған адам барып, сізге жұқса, сіз індетті отбасыңызға алып келсеңіз, онда біз үлкен күнә жасаған боламыз. Алла сақтасын. Алдағы уақытта құрметті жамағат ҚМДБ пәтуасына бағынып, осы пәтуаларды, мәлімдемені сақтауға шақырамыз, - деді Наурызбай қажы. 

Шенеуніктер 42 500 теңге туралы мәлімдеме жасады
Шымкентте елестер үйінде Қонаевтың бейнесі пайда болды
Сәйкес тақырыптар
Көтерілу
×