Түркістан облысында учаскелік полиция инспекторлары 3 жасар қыз баланы тауып, анасына табыстады. Бұл туралы облыстық полиция департаментінің баспасөз қызметі хабарлады. 

Жетісай қаласына қарасты №2 учаскелік тірек пунктіне бекітілген учаскелік полиция инспекторлары жоғалған 3 жасар қызды тауып, анасына табыстады. 

Белгілі болғандай, полиция майорлары Еркен Мейіржабаев пен Абзал Ақшораев өздеріне бекітілген әкімшілік аумақтарында қылмыстар мен құқықбұзушылықтардың алдын алу, анықтау, сондай-ақ қоғамдық тәртіп пен қауіпсіздікті қамтамасыз ету мақсатында көшелер мен аулаларға шығып, сағат 17:00 шамасында А.Байтұрсынов көшесі бойында кішкентай қыздың жылап, үйін таппай адасып жүргенін байқайды. 

Олар шамамен жасы 3-4-тегі бүлдіршіннен есімін, ата-анасын, мекенжайын сұрай бастайды. Алайда тілі толық шықпаған қыз бала, ешқандай нақты мәлімет бере алмайды. 

Тәртіп сақшылары балақайды жұбатып, учаскелік полиция пунктіне жеткізіп, ас-суын береді. Одан ары іздестіру жұмыстарын жүргізіп, сол аумақтағы тұрғындар арасында сұрастыру жұмыстарын жүргізеді. Үй-үйді қарап, қыздың ата-анасын іздейді. Жедел жүргізілген іздестіру, сұрастыру жұмыстары нәтижесінде, полицейлер 1 сағат ішінде қыздың ата-анасын табады. 

Тексеру барысында анықталғандай, 3 жасар қыз далада ойнап жүріп, ауласынан шығып, алыстап кеткен. Ал үйінде одан кішкентай баласымен отырған анасы байқамай қалған. Өз кезегінде 3 жасар қыздың анасы қызын тауып берген полицейлерге шынайы ризашылығын жеткізді. 

"Қызымды аяқасты жоғалтып алдым. Өзім іздеп шыққан едім, осы аралықта полицейлер қызымды аман-есен тауып, қауіпсіздігін қамтамасыз еткеніне ризамын. Ел қорғандарының жұмысы алға баса берсін!", - деп атап өтті ол.