Бүгінде Қазақстандағы мемлекеттік қызметкерлердің жартысынан астамын әйелдер құрайды. Алайда саяси және басшылық лауазымдарда олардың үлесі айтарлықтай төмен.

Мемлекеттік қызмет істері агенттігі деректеріне қарағанда, 2026 жылғы 1 қаңтардағы жағдай бойынша Қазақстандағы барлық мемлекеттік қызметшілердің 56%-ын әйелдер құрайды. Алайда басшылық қызметтегі әйелдердің үлесі едәуір төмен – 38,9%. Соңғы жылдары бұл көрсеткіштер айтарлықтай өзгермеген: мемлекеттік қызметтегі әйелдердің үлесі 55–56% деңгейінде сақталса, басшылық лауазымдарда шамамен 39% шамасында қалып отыр.

Қазіргі уақытта Қазақстанда әйел әкімдер жоқ. Сондай-ақ Ұлттық статистика бюросы ұсынған 2024 жылғы мәліметтерге сәйкес, саяси мемлекеттік қызметшілер арасында әйелдер саны ерлерге қарағанда әлдеқайда аз –59 әйел және 692 ер адам. Ал әкімшілік мемлекеттік қызметшілер арасында жағдай өзгеше: мұнда әйелдер саны ерлерден көп. Әйелдер – 47 099 адам, ал ерлер – 36 632 адам. Қазіргі таңда Үкімет құрамында үш әйел-министр бар, ал ер министрлер саны – 21.