Қырғызстанда он үшінші рет өткен халықаралық айтыста қазақ ақындары елге жүлдемен оралды. Дүбірлі додада өз қарсыластарынан оқ бойы оза түскен Айнұр Тұрсынбаева бас жүлдені иеленсе, бірінші орынға Жандарбек Бұлғақов, екінші орынға Мұхтар Ниязов лайық деп танылды. Ал үшінші орынды Балғынбек Имашев қанжығасына байлапты. Бұл қуанышты хабарды айтыскер ақындар өз парақшаларына жарыса жариялап, сүйінші сұраған. 

Қырғызстанда өткен айтыс туралы Instagram желісінде жазған ақындардың бірі - Балғынбек Имашев елімізде өткен халықаралық айтысқа салыстырмалы түрде көңілі толмайтынын ашып айтты.

"Қазақ-қырғыз еларалық айтысы бірде-бір рет өткен емес. Қытайдан, Моңғолиядан, Қырғызстаннан 1-2 ақын шақырып аламыз да, Халықаралық айтыс өтті деп дүркіреп қоямыз. Айтыс қазақ пен қырғызда ғана! Басқа мемлекеттен келген ақындар өз қандастарымыз. Сонда біз Дүние жүзі қазақтарының айтысы немесе халықаралық қазақ-қырғыз айтысы деп өткізуіміз керек" - деді айтыскер ақын.

Қырғызстандағы айтыс пен елімізде өткен халықаралық айтысты салыстыра жазған айтыскер Балғынбек Имашев Мәдениет министрлігі қолдау көрсетсе, осы мәселені қолға алатынын айтты.