Түркістан облысы прокуратурасы мүдделі органдардың қатысуымен өткен алқа отырысында мемлекеттік сатып алу туралы заңнаманың сақталуына жүргізілген талдау нәтижелерін қарады. Бұл туралы аталған органның ресми сайты хабарлады.

Талдаумен жекелеген тапсырыс берушілердің қызметінде заңдылықты бұзушылықтарға жол берілгенді  және уәкілетті орган жұмысының пассивтілігі анықталған.

Мысалы, Ордабасы, Төлеби және Түлкібас аудандарының тұрғын үй-коммуналдық шаруашылық бөлімдері 2 млрд. теңгеден астам сомаға мемлекеттік сатып алу шарттарын бәсекелестік емес тәсілмен заңсыз түзген (бір көзден заңсыз өткізген).

Прокурорлардың актілері бойынша 100-ден астам заң бұзушылық жойылды, 7 млрд. теңгеден астам заңсыз мемлекеттік сатып алудың күші жойылды (сатып алу тәсілдерін дұрыс қолданбаған, қатысушыларға артық талаптар қойған).

Ал прокурорлардың шараларымен түрлі жауаптылыққа 50-ден астам лауазымды тұлға тартылып, мемлекеттік бюджетке 15 млн. теңгеден астам қаражат өндірілді.

Алқа отырысының қорытындысы бойынша мемлекеттік органдарға осы бағыттағы жұмысты күшейту және тапсырыс берушілерге - заңнаманың талаптарын қатаң сақтау тапсырылды.

Мемлекеттік сатып алу туралы заңнаманың сақталуы - прокуратура органдарының назарында, бұл бағыттағы жұмыс тұрақты жүргізіліп отыратыны атап өтілді.