Жуырда «Ақ жол» демократиялық партиясының мүшесі Қазыбек Иса «Елбасы» атауын толықтай жою керек екенін айтты, деп хабарлайды Oinet.kz тілшісі Orda.kz-ке сілтеме жасап.

Мәжіліс депутаты, «Ақ жол» демократиялық партиясы фракциясының мүшесі Қазыбек Иса рақымшылық туралы заң жобасындағы «Елбасы» атауының қолданылуын заңсыз деп атап өтті.

«Заң жобасының 4-бабында рақымшылық қолданылмайтын адамдар тізімі берілген. Соның ішінде 13-тармақта «ҚР Тұңғыш Президентінің – Елбасының өміріне қол сұғушылық» бабы (ҚК 166-1) көрсетілген. Алайда біз 2023 жылдың 11 қаңтарында «ҚР Тұңғыш Президенті – Елбасы туралы» заңның күшін жойдық. Ол заң 2023 жылғы 13 ақпанда ресми түрде күшіне енді. Ендеше неге бүгін қабылданып отырған жаңа заңда «Елбасы» деген атау заңсыз қолданылып отыр?» – деді депутат.

Қазыбек Иса бұл норманы «заңсыздық» деп атап,  Қылмыстық кодекстің 166-1-баптың өзі бұрынғы заң негізінде енгізілгенін еске салды. Оның айтуынша, кейін қабылданған заң бұрынғы заңның күшін жоятындықтан, барлық қолданыстағы заңдардан «Елбасы» атауын толық алып тастау қажет.

«Бұл жерде «экс-президент» деп қана жазылуы тиіс! Барлық заңдардан, барлық құжаттардан «Елбасы» атауы жойылуы керек!» – деді ол.

Депутаттың бұл сауалына Ішкі істер министрлігінің өкілі емес, заң жобасын таныстырған Мәжілістің Заңнама және сот-құқықтық реформа комитетінің мүшесі Абзал Құспан жауап берді.

Алайда аталған порталдың жазуынша, 2019 жылы Қазыбек Исаның Елбасыны қолдап, көзқарасын ашық айтқан мәлімдмелері бар. 2019 жылы «Казахстанская правда» басылымындағы «Елбасының өлшеусіз рөлі» атты мақалада Қазыбек Иса Астанаға Елбасының атын беру өте дұрыс шешім екенін атап өткен.

«Елбасымыз ел игілігі үшін аянбай еңбек етті. Ол ұлтымыздың шаңырағын көтеріп, керегесін кеңейтті. Бұл жылдар тарихта «Назарбаев дәуірі» ретінде қалады.

Қиын-қыстау кезеңде гүлденген Алматыдан қаһарлы қысымен танылған Ақмолаға астананы көшіру – саяси ерлік болды. Сол кезде қарсы жақ түгіл, жанындағы серіктерінің өзі бұл бастамаға күмәнмен қараған еді. Ал бүгінде біз Елбасы салған, бас сәулетшісі болған әсем қалада өмір сүріп жатырмыз. Сондықтан елорданы оның есімімен атау – саяси тұрғыдан орынды шешім, – деген екен 2019 жылы «Ақ жол» демократиялық партиясы төрағасының орынбасары Қазыбек Иса.