Түркістан қаласында діни экстремизм мен терроризмнің алдын алу, олардың зиянды идеологияларын ерте кезеңде анықтап, оған қарсы тиімді шаралар қабылдау мақсатында кең ауқымды семинар-кеңес өтті.

Іс-шараға Ұлттық қауіпсіздік комитетінің Түркістан облысы бойынша департаменті, облыстық прокуратура мен полиция департаменті, облыстық дін істері және білім басқармаларының өкілдерімен қатар, аудан мен қала әкімдіктерінің жауапты тұлғалары да қатысты. Көпсалалы жиынға облыс әкімінің бірінші орынбасары Зұлпыхар Жолдасов төрағалық етті. Бұл семинар діни радикализмге қарсы күресте мемлекеттік құрылымдардың бірлескен іс-әрекетінің қаншалықты маңызды екенін көрсетті.

Күн тәртібіндегі басты тақырып – 2024-2026 жылдарға арналған «Кәмелетке толмағандар арасында экстремизм мен терроризмнің алдын алу» жөніндегі жол картасының орындалу барысы болды. Осы бағытта қолға алынған нақты шаралар мен жүргізіліп жатқан оңалту жұмыстары туралы баяндалды. Бұл жол картасы әсіресе жастар мен жасөспірімдер арасында радикалды идеологияның таралуына тосқауыл қоюды, оларды ерте кезеңде анықтап, қоғамға бейімдеу бойынша кешенді жұмыстар жүргізуді көздейді. Түркістан облысында бұл бағытта бұған дейін де бірқатар іс-шаралар жүзеге асырылған. Атап айтқанда, жастармен тұрақты түрде теологиялық бағыттағы кездесулер ұйымдастырылып, жат ағымдардың белгілері мен олардың ықпалынан сақтану жолдары туралы ақпараттық-түсіндіру жұмыстары жүйелі түрде жүргізілуде.

Семинар барысында қоғамдағы діни тұрақтылық пен этносаралық келісімді сақтау, діни радикализмнің алдын алу, халықтың діни сауаттылығын арттыру жайы кеңінен талқыланды. Жиынға қатысушылар, әсіресе жастар арасындағы түсіндіру жұмыстарын күшейту қажеттігін айтты. Қазіргі таңда ғаламтор арқылы түрлі экстремистік контенттің таралуы артып келеді, бұл жастардың радикалды идеяларға тартылу қаупін ұлғайтып отыр. Сондықтан діни экстремизм мен терроризмге қарсы күрес тек құқық қорғау органдарының міндеті емес, ол – тұтас қоғам болып жұмыла атқаратын жұмыс.

Осы ретте Зұлпыхар Жолдасов өз сөзінде бұл мәселенің маңыздылығына ерекше тоқталып, қоғамның белсенділігі мен ақпараттық-түсіндіру жұмыстарының жүйелі түрде жүргізілуі қажет екенін атап өтті. «Экстремизм мен терроризмнің алдын алуда жүйелі ақпараттық-түсіндіру жұмыстарының және қоғамның белсенділігінің аса маңызды екенін» жеткізді. Бұл – бүгінгі таңда ел қауіпсіздігін қамтамасыз етудің басты бағыттарының бірі. Сонымен бірге, жастармен жұмыста жай ғана лекция немесе жиын өткізу жеткіліксіз екені айтылды. Жасөспірімдердің қызығушылығы мен жас ерекшелігіне сай форматта түсіндіру тәсілдерін жетілдіру қажеттігі сөз болды.

Облыста бұған дейін де «Экстремизмге жол жоқ», «Жастар радикализмге қарсы» секілді өңірлік деңгейдегі акциялар, форумдар мен кездесулер өткізілген. Түркістан облысының барлық аудан, қалаларында дін істері басқармасының үйлестіруімен теологтар мен дін саласының білікті мамандары мектептерде, колледждерде, ЖОО-ларда жүйелі дәрістер оқып, сұрақ-жауап форматында ашық кездесулер ұйымдастыруда. Мұндай кездесулердің нәтижесінде көптеген жас жат ағым жетегінен аман қалып, қалыпты өмірге қайта бейімделген. Облыста деструктивті діни ағым мүшелеріне арналған оңалту орталықтары да жұмыс істейді. Бұл орталықтарда теологтар мен психологтар бірлесіп жұмыс істеп, сенім жолынан адасқандарды қоғамға бейімдеумен айналысады. Сонымен қатар, пробациялық бақылаудағы азаматтарға арналған арнайы бағдарламалар жасалып, оларға психологиялық, құқықтық және діни көмек көрсетілуде.

Жиын барысында сондай-ақ, мемлекеттік органдар мен дін саласы мамандары, білім беру мекемелері арасындағы өзара әрекеттестік тетіктерін жетілдірудің маңыздылығы айтылды. Түркістан облысының өңірлік ерекшеліктерін ескере отырып, аудандар мен қалаларда нақты нәтижеге бағытталған оңалту жұмыстарын күшейту тапсырылды. Семинардың соңында аудандық білім бөлімдері мен теологтар арасындағы байланысты одан әрі нығайту, оқушылар мен студенттер арасында мақсатты аудиторияға бағытталған түсіндіру науқандарын жүргізу, оқу орындарында діни экстремизм мен терроризмге қарсы тұрақты іс-шаралар өткізуді ұйымдастыру туралы нақты ұсыныстар айтылып, жауапты тұлғаларға тапсырмалар берілді.

Қазіргі кезеңде экстремизм мен терроризм – тек Қазақстан үшін емес, бүкіл әлем елдері үшін қауіп төндіретін жаһандық проблемаға айналып отыр. Жат идеологиялар ең алдымен жастарды нысанаға алады. Олар – қоғамның ең әлсіз әрі әсерге бейім бөлігі. Сондықтан дәл осы топпен жұмыс істеу аса маңызды. Түркістан облысында жүргізіліп жатқан кешенді іс-шаралар, осындай семинарлар мен кеңестер – қауіптің алдын алу жолындағы маңызды қадам. Мемлекет бұл бағытта білім беру ұйымдарымен, діни және құқық қорғау саласының өкілдерімен тығыз жұмыс жүргізіп отыр. Экстремизм мен терроризмге қарсы тиімді күрес тек құқықтық шаралармен шектелмей, ақпараттық, әлеуметтік, рухани тұрғыда да жүзеге асырылуы тиіс. Түркістанда өткен бұл семинар осы көпқырлы жұмыстың нақты көрінісі болды.