Түркістан: «Нөлдік төзімділік» қағидасы белсенді қолданылуда
Түркістан облысында қоршаған ортаны қорғау және елді мекендердің санитарлық жағдайын жақсарту бағытында «Таза Қазақстан» бағдарламасы аясында жүйелі жұмыстар қолға алынған.
Аталған бастаманың орындалу барысы облыс әкімінің тікелей бақылауында тұр. Өткен апта ішінде өңірдің түрлі аудан-қалаларында 187 рет ауқымды тазалық іс-шарасы ұйымдастырылып, нәтижесінде 63 мыңнан астам тұрғын белсенді түрде атсалысты. Жұмыс ауқымы кең — тазалық жұмыстары барысында 193 тонна тұрмыстық және өндірістік қалдықтар арнайы орындарға шығарылған. Қазіргі таңда бұл бағыттағы жұмыстарды үйлестіру, бақылау және тиімді іске асыру мақсатында жүйелі мониторинг пен нақты тапсырмалар негізінде жұмыс жүргізілуде.
Облыс әкімі Нұралхан Көшеров апталық аппарат мәжілісінде бұл бағыттағы жұмыстардың кемшіліктерін ашық айтып, жауапты тұлғаларға нақты міндеттер жүктеді. Атап айтқанда, ауылдық округтер мен елді мекендердегі тазалық мәселесіне жауапкершілікпен қарау қажеттігін баса айтты.
“Ауыл-аймақтарда жиналатын қоқыстарды жүйелендіру үшін ауыл әкімдіктері тарапынан бақылауды күшейту қажет. Аудан, қала аумағында мониторинг жұмыстарын жүйелеп, қоқыс жиналатын заңсыз орындарды жойыңыздар. Өз жұмысын тиісті деңгейде атқармай, салғырттық танытып отырған жауапты тұлғаларға шара көріледі,” – деді облыс әкімі. Бұл сөздердің өзі атқарушы органдарға үлкен міндет артып отыр. Нақты нәтижеге жұмыс істемейтін қызметкерлерге қатысты нөлдік төзімділік қағидасы негізінде шара қолдану ұстанымы қатаң сақталатыны мәлім болды.
Жиын барысында облыс әкімінің бірінші орынбасары Зұлпыхар Жолдасов «Таза Қазақстан» бағдарламасы аясында жүзеге асырылған іс-шаралар туралы егжей-тегжейлі баяндама жасады. Ол тұрғындарды белсенді қатыстырумен қатар, экологиялық мәдениетті арттыру мақсатында кең көлемде ақпараттық жұмыс жүргізіліп жатқанын атап өтті. Қазіргі таңда облыс аумағында экологиялық акцияларды насихаттау және санитарлық тәртіпке баулу мақсатында 101 билборд орнатылып, арнайы дайындалған 571 бейнеролик 139 телеарна мен 9 685 әлеуметтік желі парақшасында жарияланған. Мұндай ақпараттық қолдаулар халық арасында экологиялық жауапкершілікті арттырып, тәртіпке шақыруда маңызды рөл атқарып келеді.
Сонымен қатар, «TazaQazBot» атты арнайы ақпараттық жүйе арқылы тұрғындардан келіп түсетін өтінімдер де жылдам қаралуда. Бүгінгі күні осы жүйе арқылы 2 993 өтінім тіркелген. Соның ішінде 2 979 өтінім толығымен орындалған, ал қалған 14 өтінім орындалу үстінде. Бұл – әкімдік пен тұрғындар арасындағы байланыстың жаңаша әрі жедел тәсілге көшкенінің дәлелі. Осы жүйе арқылы кез келген азамат елді мекендегі санитарлық ахуал жөнінде жедел ақпарат беріп, нақты нәтиже күтетін мүмкіндікке ие.
Түркістан облысында санитарлық ережелерді бұзғандарға қатысты да қатаң шаралар қолданыла бастаған. Биылғы жылдың өзінде қоғамдық орындарда тазалық нормаларын сақтамаған 20 465 адамға хаттама толтырылып, 498 миллион теңге көлемінде айыппұл салынған. Соның ішінде 247 миллион теңге өндірілген. Бұл сандардан айқын байқалатыны — өңірде нөлдік төзімділік қағидасы белсенді түрде қолданылып келеді. Қоршаған ортаны ластауға, рұқсатсыз қоқыс төгуге немесе санитарлық нормаларды бұзуға ешқандай кешірім жасалмайды. Бұл ретте құқық қорғау және санитарлық қызметтермен бірге, жергілікті әкімдіктердің тиісті бөлімдері де үздіксіз бақылау жүргізіп келеді.
Аймақ басшысы Нұралхан Көшеровтің тапсырмасына сәйкес, елді мекендерде тұрақты түрде рейдтер ұйымдастырылып жатыр. Мысалы, Сарыағаш ауданындағы «Қапланбек» және «Қазығұрт» шекара бекеттерінің маңында анықталған рұқсатсыз қоқыс тастау фактілері бойынша шұғыл шаралар қабылданып, қалдықтар тиісті орындарға шығарылған. Ал Кентау қаласының базарларында жүргізілген кезекті рейд барысында бірнеше заң бұзушылық анықталып, тәртіп бұзғандарға әкімшілік хаттамалар толтырылды. Мұндай тексерулер арқылы ғана тұрақты тәртіп пен экологиялық мәдениет қалыптастыруға болады.
Облыстағы тазалық жұмыстары тек аулаларды тазартумен шектелмейді. Ол – қоғамдық сана мен жауапкершілік деңгейін арттыруға бағытталған кең көлемді мемлекеттік бағдарлама. «Таза Қазақстан» бағдарламасы – бұл экологиялық тәртіпті, азаматтық белсенділікті, жергілікті билік пен халық арасындағы тиімді байланысты нығайтудың нақты үлгісі. Түркістан облысында осы бағдарлама шеңберінде жүргізіліп жатқан жұмыстар жүйелі сипатқа ие болып, қоғамның барлық саласын қамтып отыр. Әкімдік тарапынан талап күшейіп, жауапсыздық пен салақтыққа жол берілмеу керектігі қайта-қайта ескертілуде. Санитарлық тәртіпке бейжай қарағандарға қатысты заң шеңберінде шара көру – қоғамдық жауапкершілікті арттыру жолындағы маңызды құрал. Бұл бағыттағы жұмыстар алдағы уақытта да күшейе түспек.