Шымкент қаласында «Рухани құндылықтар және патриоттық тәрбие» бағытында жүргізіліп жатқан маңызды жұмыстардың бірі ретінде қазақ халқының рухани мұрасын, ел тарихын, салт-дәстүрі мен әдет-ғұрпын, сондай-ақ қазақ халқының болмысын насихаттау мен ілгерілетуге бағытталған іс-шаралар көптеп өтіп жатыр.

Соның бірі Шымкент қаласында «Ұлттық құндылықтар академиясы» Республикалық қоғамдық бірлестігі (РҚБ) Шымкент филиалы, қалалық Ардагерлер кеңесі және Шымкент қалалық білім басқармасының Әдістемелік орталығы бірлесіп ұйымдастырған «Цифрлық қоғамның мүмкіндіктері мен тәуекелдері: ұлттық құндылықтар тұғырындағы тәлімді тәрбие» атты аймақтық форум. 

Форумның басты мақсаты – қазіргі цифрлық қоғамның даму мүмкіндіктері мен туындайтын тәуекелдерін жан-жақты саралай отырып, жасанды интеллект пен ұлттық құндылықтар арасындағы үйлесімділікті қамтамасыз ету, тәжірибе алмасу және педагогикалық қауымдастық арасында құндылықтарға негізделген тәрбиелік бағыттарды нығайту болып табылады.

Форум бағдарламасы мазмұнды әрі жан-жақты құрылып, қатысушыларды тіркеуден бастап, ұлттық құндылықтарға арналған ғылыми және оқу-танымдық әдебиеттердің көрмесімен таныстырудан басталды. Пленарлық мәжілісте еліміздің беделді ғалымдары, профессорлары мен тәжірибелі педагогтары цифрлық технологиялардың тәрбиедегі рөлін, олардың оң және теріс әсерлерін, сондай-ақ ұлттық құндылықтарды сақтаудағы маңызын кеңінен талқылады.

Панелдік сессия барысында «Құндылықтарға негізделген мазмұндық концептілерді педагогикалық практикада іске асыру тәжірибелері» тақырыбында бірнеше баяндамалар тыңдалып, жасанды интеллект құралдарын білім беру мен тәрбие үдерісіне енгізудің тиімді әдістері мен құралдары қарастырылды. Бұл сессия педагогтардың жаңа технологияларды дәстүрлі құндылықтармен үйлестіре қолдану тәжірибесін жетілдіруге мүмкіндік берді.

Сонымен қатар, шеберлік дәрістерінде педагогтар мен әдіскерлер жасанды интеллектті тәлім-тәрбие процесінде тиімді пайдалану жолдарын егжей-тегжейлі талқылады. Қатысушылар арасында тәжірибе алмасу кеңінен жүргізіліп, заманауи цифрлық шешімдер мен инновациялық педагогикалық идеялар ұсынылды.

Форум жұмысына «Шымкент Қаласы Кәсіподақтар Орталығы» Аумақтық кәсіподақтар бірлестігінің төрағасы Бауыржан Ілімшаұлы Алтеев арнайы қатысып, ұйымдастырушылар мен қатысушыларға қолдау білдірді. Оның қатысуы қазіргі цифрлық трансформация жағдайында еңбек адамының рөлі мен ұлттық рухани құндылықтарды сақтау мәселелеріне ерекше назар аударылғанын көрсетті.

Іс-шара барысында ұлттық құндылықтарды сақтай отырып, заманауи технологияларды тиімді пайдалану және жас ұрпаққа тәлімді тәрбие берудің жаңа тәсілдері жан-жақты талқыланды. Форум соңында арнайы Декларация қабылданып, онда цифрлық қоғам жағдайында өскелең ұрпақтың тәрбиесі мен құқықтық қорғанысын қамтамасыз етуге бағытталған негізгі ұстанымдар бекітілді.

Декларацияда ұлттық тәлім-тәрбиенің тарихи бастауларына терең үңілу қажеттілігі, ұлт тұлғаларының педагогикалық мұраларын зерттеу, жастар санасына ұлттық мәдени құндылықтарды енгізу маңыздылығы айқындалды. Сондай-ақ, ұлы даланың дәстүрі, салт-санасы және мінез-құлық қалыптары қазіргі цифрлық буынға түсінікті форматта насихатталуы тиіс екені атап өтілді. Жастардың коммуникативтік мәдениетін қалыптастыру, ақпараттық қауіпсіздік пен интернет этикасын сақтау мәселелері де өзекті бағыт ретінде қаралды.

Жасанды интеллект технологияларын қолдану баланың білім алу, оқу және дамуына кері әсерін тигізбейтіндей деңгейде жүзеге асырылуы қажет екендігі, сондай-ақ ЖИ енгізу барысында этикалық және құқықтық нормаларды сақтау, қадағалау тетіктерін күшейту және балалардың дербес деректерін қорғау маңызды міндеттер ретінде қойылды. Қоғамда кездесетін заңдық және әлеуметтік кедергілерге қарамастан, ЖИ құралдарының болашақта күнделікті қолданылатын қажетті педагогикалық құралдарға айналатыны жөнінде ортақ пікір түйілді.

Бұл Декларация форумға қатысушылардың ортақ ұстанымын білдіріп, мектептерге, педагогтарға, ата-аналарға және қоғамдық ұйымдарға бағыт-бағдар беретін құжат ретінде қабылданды. Осындай маңызды шаралар арқылы Шымкент қаласында ұлттық рухани құндылықтарды сақтау мен дамыту, патриоттық тәрбие беру саласындағы жұмыстар жаңа деңгейге көтеріліп, жас ұрпақтың санасына терең ықпал етуде.