Шымкент қалалық жасөспірімдер кітапханасында ұлттық руханиятты дәріптеуге ерекше серпін беретін «Бір ел – бір кітап», «Бір қала – бір кітап» акциялары аясында қазақ әдебиетінің көрнекті өкілдері – Тәкен Әлімқұлов, Жұмекен Нәжімеденов және Зейнолла Қыстаубайұлының шығармашылығына арналған «Ұлттық рухтың темірқазығы» атты мазмұнды іс-шара өтті. 

Бұл басқосу биыл туғанына 90 жыл толған ойшыл ақын, философ-жазушы Жұмекен Нәжімеденовтің мерейтойымен де тұспа-тұс келіп, оның ұлттық поэзиядағы тұлғалық болмысына жаңа қырынан үңілуге мүмкіндік берді.

Шымкент қаласында кейінгі жылдары жүргізіліп жатқан «Рухани құндылықтар және патриоттық тәрбие» бағыты аясындағы жұмыстардың бірі – әдеби мұра арқылы жас ұрпақтың тарихи танымын кеңейту. Кітапханадағы бұл кештің мақсаты да дәл осы: қазақтың сөз өнерінде қаланған өр рухты, елдіктің негізін айғақтайтын шығармаларды жас буын жүрегіне терең орнықтыру.

Шара қонақтары – Қаратау дәстүрлі өнер мектебінің педагог-ұйымдастырушысы А.Орынбетова мен Ақпан батыр атындағы №10 мектеп ұстазы Ш.Бекмағанбетова жас оқырмандарды үш қаламгердің әлеміне жетелеп, олардың әдебиеттегі орны мен ұлттық жазу мектебіне қосқан үлесін кеңінен талдады. Әсіресе, Жұмекеннің тәуелсіздік рухын оятқан өлеңдері, Тәкен Әлімқұловтың ұлттық мінезді айшықтаған көркем прозасы және Зейнолла Қыстаубайұлының қазақ тағдыры мен тарихи жадына негізделген туындылары жас ұрпаққа өнеге ретінде ұсынылды.

Өнер бөлімі де ұлттық болмысты айшықтаған сәттерге толы болды. Әнші, термеші Қ.Бәйтеков терме өнерімен кештің ажарын кіргізіп, №99 мектеп-гимназиясының ұстазы И.Қыраубаева шәкірттерімен қазақ күйінің мөлдір үнін жеткізді. Қазақтың күйі мен термесі – ғасырлар бойы ұлттың рухани кодын сақтап келген өнер. Сондықтан мұндай үлгілерді жастарға таныстыру – Шымкент қаласында жүргізіліп жатқан рухани тәрбие жұмыстарының негізгі бағыттарының бірі.

«Парасат» колледжінің студенттері мен «Білім-инновация» қыз балаларға арналған №2 лицей-интернатының өнерлі оқушылары қос қаламгердің өлеңдерін жатқа оқып, ұлттық поэзияның мән-мағынасын ашса, «Болашақ» мектебінің оқушысы Б.Серікбай қазақ ән өнерінің көркемдігін паш етті.

Кеште айтылғандай, Жұмекен – мәңгіліктің ақыны, ұлттық рух пен адамдық болмыстың биік үлгісін қалдырған тұлға. Тәкен Әлімқұлов – қазақ әдебиетіндегі дара феномен, ұлттық мінездің шынайы суреткері. Ал Зейнолла Қыстаубайұлының «Тұман» романының өзегі – ұлт тағдыры мен рухани мұрат. Сондықтан олардың барлығы қазақ руханиятының темірқазығына айналған қайраткерлер.

Шымкент қаласы бүгінгі таңда тек мәдени орталық қана емес, ұлттық рухты жаңғыртып, жас ұрпақ санасына елдік пен бірліктің ұлы құндылықтарын сіңіріп келе жатқан ірі рухани алаңға айналып отыр. Осындай шаралар – соның айқын дәлелі.

Шара соңында кітапхана басшысының орынбасары Ұ.Бексейтова ұстаздар мен жас өнерпаздарға алғыс білдіріп, марапаттар табыстады.