Шымкент қаласында қазақ халқының рухани құндылықтарын сақтау және патриоттық тәрбие бағытында маңызды іс-шаралар жүйелі түрде атқарылуда. 

Солардың бірі ретінде қазақтың бірегей композиторы Әбілахат Еспаевтың туғанына 100 жыл толуына орай ұйымдастырылған «Ән қанатындағы сазгер» атты кітап көрмесін ерекше атап өтуге болады. Бұл шара М.Әуезов атындағы Оңтүстік Қазақстан мемлекеттік университетінің «Мәдениет және өнер» факультетінің аға оқытушысы Арыстанова Шолпан Сәбитқызының жетекшілігімен өткізілді.

Кітап көрмесіне қатысқан студенттер мен колледж оқушылары композитордың өмір жолы мен шығармашылық мұрасымен терең танысып, қазақ музыкалық мәдениетіндегі оның орны мен рөлін түсінді. Әбілахат Еспаевтың халық арасында кеңінен танымал «Қайдасыңдар, достарым!», «Ұстазым» сынды әндерін хормен орындау арқылы шараға ерекше рухани мән берілді.

Бұл іс-шараның маңызы – ұлттық музыка өнерін жастар арасында насихаттау ғана емес, сонымен бірге қазақ халқының рухани болмысын, ұлттық салт-дәстүрлерін, мәдениетін тереңірек танытуға бағытталған. Әбілахат Еспаев сынды ұлы тұлғалардың мұрасын ұлықтау арқылы патриоттық сана қалыптасып, жастардың өз елінің тарихына, мәдениетіне деген құрметі артады.

Шымкент қаласындағы осындай рухани-мәдени шаралар қазақ халқының бай музыкалық мұрасын сақтау мен дамытуға, сондай-ақ келешек ұрпақты ұлттық құндылықтарға тарту арқылы елдің рухани тірегін нығайтуға елеулі үлес қосып отыр. Бұл бағыттағы жұмыстар қазақтың ұлттық салт-дәстүрі мен әдет-ғұрпын насихаттап, болмысымыздың айнасы болған рухани құндылықтарды ұрпақтан ұрпаққа жеткізуде маңызды рөл атқарады.

Айта кетейік, ұлттық музыка – әрбір халықтың рухани әлемінің, тарихи және мәдени кодтарының айнасы болып табылады. Қазақ халқының бай дәстүрлі музыка өнері оның ғасырлар бойы қалыптасқан болмысын, дүниетанымын және ұлттық сана-сезімін бейнелейді. Сондықтан ұлттық музыканы жастар арасында насихаттау бүгінгі күннің аса маңызды міндеттерінің бірі болып табылады.

Біріншіден, ұлттық музыка – патриотизмнің, ұлттық тәрбие мен рухани құндылықтардың қайнар көзі. Жастар ұлттық музыка арқылы өз елінің тарихы мен мәдениетін тереңірек танып, туған жерге деген сүйіспеншілігін арттырады. Мысалы, домбыра үні, дәстүрлі жырлар мен әндер қазақ халқының ұлттық ерекшелігін сезінуге, тарихи оқиғаларды ұғынуға, ата-бабаларымыздың өмірі мен еңбек жолына құрметпен қарауға ықпал етеді. Бұл өз кезегінде жастардың өз мәдениетіне деген құрметін арттырып, қоғамдағы бірлікті нығайтады.

Екіншіден, ұлттық музыка жастардың шығармашылық қабілеттерін дамытуға жол ашады. Музыкалық өнер арқылы олар өз ойларын, сезімдерін еркін жеткізіп, рухани дүниесін байыта алады. Сонымен қатар, дәстүрлі өнер түрлерін меңгеру жастарды еңбекқорлыққа, тәртіпке, шыдамдылыққа үйретеді. Бұл қасиеттер олардың тұлға болып қалыптасуында маңызды рөл атқарады.

Үшіншіден, ұлттық музыка – мәдени көптүрлілік пен толеранттылықты тәрбиелеудің құралы. Жастар әртүрлі этностардың музыкалық мұрасын таныса отырып, бір-бірінің мәдениетін құрметтеуді үйренеді. Бұл қазіргі жаһандану заманында этникалық татулық пен ұлтаралық келісімнің сақталуына септігін тигізеді.