Астанада Жапония халықаралық ынтымақтастық агенттігі , ҚР «Атамекен» ҰКП және Ұлттық экономика министрлігінің бірлесуімен ұйымдастырылған «Бір ауыл – бір өнім» жобасының республикалық көрмесі басталды.

Жоба еліміздің әр өңіріндегі шағын және микробизнеске қолдау көрсетуге бағытталған, кәсіпкерлерге өз өнімін танытуға және жаңа нарықтарға шығуға мүмкіндік береді.

Биылғы көрмеге Қазақстанның 20 өңірінен 50 отандық өндіруші қатысып отыр. Көрмеде табиғи азық-түлік өнімдері, қолөнер бұйымдары, тоқыма және киім-кешек өнімдері, косметика, сондай-ақ ауыл шаруашылығындағы инновациялық бастамалар ұсынылды. Кәсіпкерлер өз өнімдерін таныстырып қана қоймай, тәжірибе алмасып, әріптестермен байланыс орнатуға мүмкіндік алды.

Салтанатты ашылу рәсімінде ҚР Ұлттық экономика вице-министрі Ерлан Сағынаев құттықтау сөз сөйлеп, жобаның ел экономикасына қосатын үлесін атап өтті. Ол шағын және орта бизнес субъектілерін қолдау арқылы ұлттық өнімді дамыту, жаңа кәсіпкерлік бастамаларды ынталандыру маңызды екенін айтты.

«Атамекен» ҰКП Басқарма Төрағасының орынбасары Гүлнар Бижанова көрменің тек конкурс немесе көрме емес, нағыз кәсіпкерлік мектебі екенін атап өтті. Оның сөзінше, жыл сайын қатысушылардың өнім сапасы артып, ассортименті кеңейіп, маркетинг пен орам дизайны жаңа деңгейге көтеріліп келеді. «Әр бренд – еңбек, білім және өз ісіне деген махаббат арқылы жасалады. Біздің міндетіміз – кәсіпкерлерге жаңа нарықтарға шығуға қолдау көрсету және оларды ұлттық экономиканың тұрақты ойыншыларына айналдыру», – деді Гүлнар Бижанова.

Көрмеге Шымкенттен «Aksabyn» жеке кәсіпкерлігінің басшысы Айжан Машикей қатысуда. Ол асқабақ дәнінен май сығып, сонымен қатар табиғи сабын шығарады. Айжан Машикей осы жылдың Шымкент қаласында өткен «Бір ауыл – бір өнім» жобасының үш жеңімазының бірі атанды. Оның өнімдері көрмеде ерекше назар аударылып, қатысушылар мен қонақтар тарапынан жоғары баға алды.

Жоба қатысушылары кәсіби тренингтер мен семинарларға қатысып, өнімдерін қалай тиімді жарнамалау, сапасын арттыру және жаңа нарықтарға шығару жолдарын талқылады. Бұл іс-шаралар кәсіпкерлерге өз тәжірибесін арттыруға, кәсіби дағдыларын жетілдіруге және басқа өңірлердегі кәсіпкерлермен байланыс орнатуға мүмкіндік берді.

«Бір ауыл – бір өнім» жобасы Қазақстанда 2023 жылдан бері Жапония тарапынан қолдау алып, ауқымды түрде жүзеге асырылуда. Осы уақыт ішінде көптеген кәсіпкер өз брендін дамытып, жаңа өнімдер шығарды. Көрме қатысушылары бұл бастаманың кәсіби дамуға тікелей әсер ететінін айтып, жобаның болашағына сенім білдірді.

Астанадағы көрме – шағын және микробизнеске жаңа серпін беретін, тәжірибе алмасу мен кәсіби байланыс орнатуға мүмкіндік беретін алаң. Жоба қатысушылары өз өнімдерін насихаттап қана қоймай, кәсіпкерлік жолындағы маңызды тәжірибелерге қол жеткізіп, ұлттық экономиканың тұрақты дамуына үлес қосуда.