Шымкент қаласы индустриялық даму жолында қарқынды қадам жасап келеді. Сол дамудың жарқын мысалы сусындарға арналған алюминий банкалар мен қақпақ шығаратын Qazalpack зауыты. 

Бұл кәсіпорын Орталық Азияда өз саласында жалғыз болып, еліміздің индустриялық қауіпсіздігі мен стратегиялық тәуелсіздігіне нақты үлес қосуда.

Зауыт өз жұмысын 2022 жылдың қазан айында бастады. Жобаны жүзеге асыру үшін 23,4 миллиард теңге инвестиция салынды. Қысқа мерзім ішінде өндіріс толық қуатымен жұмыс істей бастады. Қазіргі уақытта зауытта 360 адам тұрақты жұмыспен қамтылған, ал кәсіпорын іске қосылған сәттен бастап 330-дан астам жаңа жұмыс орны ашылды. Бұл  Шымкенттің әлеуметтік-экономикалық дамуына қосылған маңызды үлес.

Qazalpack зауытының өндірістік қуаты өте үлкен: жылына 1,2 миллиард алюминий банка және 1 миллиард қақпақ шығару мүмкіндігі бар. Бұл тек ішкі нарықты толық қамтамасыз етуге ғана емес, өнімді шетелдік нарыққа шығару мүмкіндігін де береді. Бүгінде зауыт өнімдері Қазақстанның әр өңірінде сұранысқа ие болып қана қоймай, Өзбекстан, Қырғызстан, Ресей және Тәжікстан елдеріне экспортталады. Компания экспорттық әлеуетті арттыруға ерекше көңіл бөледі, бұл Қазақстанның сыртқы нарықтағы бәсекеге қабілеттілігін нығайтуға мүмкіндік береді.

Зауыттың маңыздылығы тек өндіріс көлемімен шектелмейді. Qazalpack шетелдік жеткізушілерге тәуелділікті 80%-ға дейін төмендетіп, отандық өндірістің дамуына үлес қосты. Бұл кәсіпорынның стратегиялық рөлі  еліміздің өндірістік қауіпсіздігін күшейту және экономикаға тұрақтылық әкелу.

Өндіріс процесі заманауи технологияға негізделген. Алюминий банкалар мен қақпақтар сапалы материалдан жасалып, әр кезеңде қатаң бақылаудан өтеді. Автоматтандырылған желілер арқылы кесу, құю, жинау және қаптау жұмыстары жүргізіледі. Осындай қатаң бақылау өнім сапасының біркелкілігін қамтамасыз етеді және тұтынушы сенімін арттырады.

Компанияның басты мақсаты нарыққа сенімді, сапалы өнім ұсыну. Әрбір тауар өндірістің жоғары стандартқа сәйкес жасалғанын көрсететін нақты дәлел. Сонымен қатар, зауыт өңірде жаңа технологияларды енгізуге, кәсіби кадрларды даярлауға және өндіріс мәдениетін дамытуға үлес қосады.

Qazalpack зауыты Шымкент индустриясының мақтанышы болып отыр. Жоғары технология, ірі өндірістік қуат, экспорттық бағытты дамыту және отандық нарыққа қосқан үлесі.