Майра Ілиясова өзін айыптаған Меруерт Түсіпбаеваны сотқа беретін болды

Oinet.kz 17-10-2021 4206

Танымал эстрада жұлдызы Майра Ілиясова өзінен Әлібиге деп жиналған ақшаның есебін сұраған Меруерт Түсіпбаеваға жауап берді. Ол өнердегі әріптесінің тағып отырған айыбының орынсыз екенін алға тартып, қаржының өзіне берілмегенін жеткізді. Ілиясова алдағы уақытта Түсіпбаены сотқа беруге ниетті екенін де айтты.

Screenshot_6.jpg

Майра Ілиясова өзін кінәлаған әріптесіне Instagram желісі арқылы жауап берген. Ол да парақшасында азулы жазба жариялап, бұл оқиғаға қатысты бар ойын ақтарған. Өнер иесінің сөзінше, Әлібиге деген жиналған ақшаның барлығы оның әпкесінің картасына түсіп отырған. Ол өзіне ешқандай ақша берілмегенін айтты.

"Меруерт Түсіпбаева Әлібиге байланысты мәселеге орай менің тарапыма жағымсыз әңгіме көтеріп отыр екен. Кешелі бері дос, таныс, туыс, өнер жанашырлары хабарласып:"Сіз жайлы жайсыз әңгіме таратып жатыр",-деп алаңдаушылық танытуда. Сонда да сабыр сақтауға, айқайға қамшы басып даурықпауға тырыстым. 

Ал, енді халық алдында жауап берейін.

"Алдында жинаған ақшаның есебі - Майра Ильясовада. Халықтан жиналған 4 млн. теңгені сол кісіге тапсырдық", депсің. Ол ақша неге маған берілу керек? Халық жинаған қаражат карточкасының номері жазылып көрсетілген Әлібидің әпкесі Табышова Нұрбақыт Қаныбековна ханымға бірден аударылып отырды. Маған ешқандай ақша берілген жоқ. Әлібиге көмек ретінде бәріміз, яғни Меруерт Өтекешова, Қанат және Света Айтбаевтар, Асхат Маемиров, Әлібидің курстастары біраз адамдар атсалыстық. Мен "Айдын Нұры" қорына Әлібиге көмек ретінде өтініш білдіргенімде, 1 млн. теңге Әлібидің әпкесі Нұрбақыт ханым карточкасына аударылды", - деп ағынан жарылды әнші. 

Сонымен қатар, Ілиясова өзі жалдаған адвокаттарға да қатысты пікір білдірді. Оның айтуынша, қорғаушыларды ол бір өзі таңдамаған. 

"Біз Майра Ильясоваға айтқанбыз, сіз тапқан адвокаттардан бас тартайық деп",-дейсің. Осы екі адвокат ұсынылған кезде Әлібидің ұстаздары Асхат Маемиров, Меруерт Өтекешова бастаған топ мүшелері мақұлдап, бәріміз шешім қабылдағанбыз. Ақша туралы есеп сол 2 адвокаттан сұралу керек. Мен бар жоғы Әлібиді қорғаған қолдаушының бірімін. Осы кезге дейін біздің жан айқайымызға құлақ асқан ешқандай құзырлы органдарды көргеніміз жоқ. Әлібидің мәселесі сен өзің ғана шешетін немесе әлеуметтік желіде хайп жасайтын әңгіме емес.

"Жаптым жала, жақтым күйе" етпей, әрбір мәселенің шындығына көз жеткізіп, нақтылы дәлелмен ғана жарияға жар салуға болады. Біз халықтың алдында жүргеннен кейін әрбір сөздің өзіндік салмағы, мәні, мағынасы болады. Халықтың ынтымақпен, шын ниеттестікпен, жанашырлықпен ұл-қыздарының несібесінен жырып берген әрбір қаржысы аманат. Тағы да қайталап айтайын, халықтың қаржысы түгелімен Әлібидің әпкесінің есепшотына жіберілген. Меруерт, халыққа мен туралы теріс пікір қалыптастыруға әрекет еткенің үшін, менің арыма кір келтіргенің үшін сот органдарына жүгінуіме тура келеді", - деп жазды ол. 

Айта кетейік, бұған дейін Меруерт Түсіпбаева желіде Майра Ілиясоваға жазба арнап, одан Әлібиге жиналған төрт миллионның есебін талап еткен болатын. 

Атыраудағы қазақ қызы африкалық күйеуімен қалай танысқанын айтып берді
«Сотқа берсеңіз беріңіз» - Меруерт Түсіпбаева Майра Ілиясоваға жауап берді
Сәйкес тақырыптар
Көтерілу