Бақыт нешеу? Кемдік нешеу? Құлазу нешеу?

Ақтайлақ би Қанай шешенді сынамақ болып:

– Ер басында бақыт нешеу?

– Кемдік нешеу?

– Құлазу нешеу? – деп сұрайды.

Сонда қарауыл Қанай шешен былай деп жауап береді:

– Ер басында бақыт бесеу, кемдік үшеу, құлазу төртеу.

Енді атап-атап айтайын:

-Астыңдағы атын жүрдек болса,

Жалғанның пырағы

Алғаның жақсы болса,

Үй мен қонақтың тұрағы.

Әкең – асқар тау,

Шешең – қайнар бұлақ.

Балаң жақсы болса,

Екі көздің шам-шырағы,-

Міне – бес бақыт осы.

– Атың шабан болса,

Жалғанның азабы.

Алғаның жаман болса,

Дүниенің тозағы,

Балаң жаман болса,

Көрінгеннің мазағы.

Міне – үш кемдік осы.

– Қалың ел көшсе,

Көл кұлазиды.

Қаптаған мал кетсе

Бел құлазиды.

Нарқын танымаған,

Сөз құлазиды.

Қатарынан айрылған,

Шал құлазиды,

Міне – төрт құлазу осы.

-Бәрекелді, таптың балам, – депті Ақтайлақ.