Шымкент қаласында «Рухани құндылықтар және патриоттық тәрбие» бағытында атқарылып жатқан жұмыстар қазақ халқының рухани мұрасын сақтау, ел тарихын жаңғырту, салт-дәстүрі мен әдет-ғұрпын насихаттау, сондай-ақ қазақ халқының болмысын ілгерілетуге ерекше мән беруде.

Осы маңызды бағыттағы шаралардың бірі ретінде «Шымкент қалалық музейлер бірлестігі» мемлекеттік коммуналдық қазыналық кәсіпорны (МКҚК) «Хакім Абай» музейінде Алматы облысы музейлер бірлестігінің ұйымдастыруымен өткен «Тарих пен сөз үндестігі» атты жылжымалы көрме болып табылады.

Бұл көрме Шымкент қаласы мен Алматы облысының мәдени байланыстарын нығайту, музей ісін дамыту және шығармашылық ынтымақтастықты арттыру мақсатында ұйымдастырылды. Көрменің ашылу рәсімінде Шымкент қаласы мәдениет, тілдерді дамыту және архивтер басқармасы басшысының орынбасары Меруерт Оңдасынова мен Алматы облысы музейлер бірлестігінің директоры Талғат Келімбетов құттықтау сөз сөйлеп, іс-шараның салтанатты ашылуымен ерекшеленді.

Экспозицияда қазақ руханиятының көрнекті тұлғаларының өмірі мен шығармашылығына қатысты аса құнды жәдігерлер қойылып, келушілердің зор қызығушылығын туғызды. Солардың қатарында туғанына 200 жыл толған қазақ ақындары Сүйінбай Аронұлы мен Үмбетәлі Кәрібаевтың өмірінен сыр шертетін естелік заттар мен жәдігерлер ерекше орын алды. Сонымен қатар, Қазақстанның көрнекті мемлекет қайраткері Дінмұхамед Ахметұлы Қонаевтың жеке заттары мен сырт киімдері көрмеге қойылып, тарихи тұлғаның өміріне көз жүгіртуге мүмкіндік берді.

Көрменің ең бір ерекше экспозициясы – ақиық ақын Мұқағали Мақатаевтың жеке заттары, қолжазбалары, аудармалары және ақынның өзі киіп жүрген киімдері болды. Бұл жәдігерлер көрермендердің ерекше назарын аударып, ақын әлемін тереңірек түсінуге септігін тигізді.

«Тарих пен сөз үндестігі» көрмесінің негізгі мақсаты – ғасырлар бойы ата-бабаларымыздың көздің қарашығындай сақтап келген рухани және мәдени құндылықтарды дәріптеу, жастардың бойында ұлттық мұраға деген құрмет пен сүйіспеншілік сезімін қалыптастыру. Сонымен бірге, музей қорындағы бай және тарихи маңызы зор экспонаттар арқылы қазақ ақындары мен руханиятының әлемін тың қырынан таныстыру, ұрпақтан ұрпаққа ұлттық сана мен патриоттық тәрбиені жеткізу болып табылады.

Бұл шара Шымкент қаласында рухани құндылықтарды насихаттау мен патриоттық тәрбие беру ісіндегі маңызды қадамдардың бірі ретінде қабылданып, қазақ халқының ұлттық мәдениетін дамыту мен сақтаудағы музей институттарының рөлін арттырады. Осындай көрмелер арқылы жастардың бойында тарихи сананы тереңдету, салт-дәстүрлерге құрметпен қарау және ұлттық болмысымызды дәріптеу бағытындағы жұмыстар жүйелі түрде жүргізіліп келеді.