Әл-Фараби атындағы қалалық ғылыми-әмбебап кітапханасында қазақ халқының рухани құндылықтарын дәріптеу, ұлттық болмыс пен ел тарихын жас ұрпақ санасына сіңіру мақсатында Кеңес Одағының батыры, әскери қолбасшы, жазушы Бауыржан Момышұлының туғанына 115 жыл толуына арналған «Аңызға айналған батыр» атты тағылымды ерлік сағаты өтті. 

Бұл шара – Шымкент қаласында жүзеге асырылып жатқан «ұлттық рухты жаңғырту», «ел тарихын таныту», «патриоттық тәрбие беру» бағыттарындағы жұмыстардың бірегей жалғасы.

Іс-шарада ҚР ІІМ Бауыржан Момышұлы атындағы оқу орталығының аға оқытушысы, полиция полковнигі, бауыржантанушы Айболат Маймақов батырдың өмірі мен әскери жолы туралы әсерлі естеліктер айтып, Бауыржан Момышұлының отбасы, тәрбие үлгісі, ұлттық мінез бен тектілікке қатысты ой-толғамдарын жастарға өнеге ретінде ұсынды. Оның әңгімелері батырдың тек соғыс даласындағы ерлігімен ғана емес, қазақы болмысқа адалдығымен, тәлім-тәрбиелік көзқарастарымен де ұлт жадында қалуының бір себебін терең ашты.

Шымкент қаласындағы №147, №142 және №51 мектептердің тарих және қазақ тілі пәні мұғалімдері батырдың әскери шеберлігі, тәртіп пен рухани беріктікке негізделген қағидалары, елге деген махаббаты туралы мазмұнды баяндамалар жасады. Олар Бауыржан Момышұлының шығармалары арқылы қазақ халқының батырлық дәстүрін, ерлік мектебін, ұлттық рухты ұрпақ бойына сіңірудің маңызын атап өтті.

Ө.Жәнібеков атындағы Оңтүстік Қазақстан университетінің студенттері батырға арналған арнау өлеңдер оқып, қазақ жырларындағы ерлік дәстүрін жалғастыра түсті. Сапар Талшын Момышұлының нақыл сөздерінен үзінді келтіріп, батырдың ұлттық ойлау жүйесін, тәртіп, намыс, отансүйгіштік туралы өсиеттерін тыңдаушыларға жеткізді.

Аталған іс-шараны қаладағы кітапханалар, оқу орындары, мәдени мекемелер жүзеге асырып отырған елдік құндылықтарды насихаттау ісінің жүйелі бір бөлігі десек болады. Осындай басқосулар арқылы жастар тарихты құр жаттап қоймай, оның рухын сезініп, ұлттық мінездің, елге адалдықтың, тектілік пен батырлықтың мәнін терең түсінеді. Батырлар мұрасын тану – ұлттық болмысты тану екені айқындала түседі.

Іс-шараны кітапхана директорының орынбасары Гүлмира Батырбайқызы қорытындылап, қонақтарға алғысын білдіріп, батырдың мұрасын ұлықтау – ел руханиятын нығайтудың маңызды бөлігі екенін атап өтті.

Қаладағы осындай рухани жобалар қазақ халқының ерлік дәстүрін, салт-санасын, ұлттық тарихын жас ұрпақ жадында жаңғыртып, Шымкентті руханият орталықтарының біріне айналдырып келеді.