Шымкент қаласында «Рухани құндылықтар және патриоттық тәрбие» бағытында атқарылып жатқан маңызды жұмыстар қазақ халқының бай рухани мұрасын сақтау мен насихаттауға, ел тарихын терең түсінуге және ұлттық салт-дәстүрлерімізді ұрпаққа жеткізуге бағытталған.

Соның айқын көріністерінің бірі – Атырау қаласында өткен «Шығыс пен Батыс тоғысқан Сарайшық: Ұлы даладағы тарих және мәдениет» атты халықаралық ғылыми симпозиумға Шымкент қалалық музейлер бірлестігінің қатысуы мен ТҮРКСОЙ музейлер одағына мүшелікке қабылдануы.

Бұл тарихи және мәдени шараға Қазақстан мен шетелдің жетекші ғалымдары, Түркі тілдес мемлекеттердің мәдениет және өнер ұйымдарын біріктіретін ТҮРКСОЙ ұйымының өкілдері қатысты. Симпозиум аясында Шымкенттің музейлер бірлестігіне халықаралық деңгейдегі мойындау беріліп, оған арнайы сертификат табыс етілді. Бұл оқиға музей ісін дамытуда және мәдени мұраны сақтау мен насихаттауда Шымкенттің рөлін күшейтетін маңызды қадам болды.

Шымкент қаласында музейлер мен мәдени мекемелердің халықаралық ұйымдармен ынтымақтастығының артуы – ел тарихын, халықтың дәстүрі мен әдет-ғұрпын, рухани құндылықтарын кеңінен танытуға септігін тигізеді. Бұл бағыттағы жұмыстар жастардың бойында ұлттық сананы қалыптастырып, патриоттық тәрбие беруде таптырмас құрал болып табылады.

Сондай-ақ, Шымкент қаласы мәдениет саласында түрлі жобалар мен іс-шаралар ұйымдастырып, қазақ халқының мәдениеті мен салт-дәстүрін дәріптеуге зор мән береді. Мұндай бастамалар арқылы халықтың тарихи-рухани болмысын тереңірек танытып, ұлттық құндылықтарды қорғау және ұрпақтан ұрпаққа аманаттау жүзеге асуда.

Жалпы, Шымкент қаласының музейлері мен мәдени ұйымдарының халықаралық деңгейдегі танылуы – рухани құндылықтар мен патриоттық тәрбие жүйесін нығайтудағы айқын жетістік. Бұл тәжірибе басқа өңірлер мен мәдениет саласының өкілдері үшін де үлгі болары сөзсіз. Қазақ халқының тарихы мен мәдениетін сақтап, дамыту – біздің ортақ парызымыз әрі болашақ ұрпақ алдындағы үлкен жауапкершілік.