Шымкент қалалық опера және балет театры сахнасында қазақ опера тарихында алғаш рет француз композиторы Шарль Гуноның «Ромео мен Джульетта» жауһары жаңа қойылым ретінде көрерменге жол тартты. 

25–26 қараша күндері өткен премьерада әлемдік классикалық туынды – махаббат үшін бәріне қарсы тұрған қос ғашықтың трагедиясы, музыка мен драманың шарықтау шегі көрерменге бір кеште ұсынылып, ерекше әсер қалдырды. Қоюшы режиссер Янис Коккос Шекспирдің мәңгілік шығармасындағы драматургияны, кейіпкерлердің сезімдік қақтығыстарын және Гуно музыкасының көркем үйлесімін қазіргі заман көрерменіне жаңаша тыныспен ұсынды.

Бұл мәдени оқиға Шымкент қаласында «Рухани құндылықтар және патриоттық тәрбие» бағытында атқарылып жатқан жұмыстарға ерекше серпін берді десек болады. Қазақ халқының рухани құндылықтарының дамуы, ел тарихы, салт-дәстүрі мен әдет-ғұрпы, сондай-ақ қазақ халқының болмысын ілгерілету мақсатындағы жұмыстар аясында осындай әлемдік деңгейдегі операның қойылуы жастар мен халықтың мәдени сауатын арттырып, ұлттық тәрбиеге тың серпін қосады.

«Ромео мен Джульетта» операсы – адамгершілік құндылықтарды, адалдық пен махаббатты дәріптейтін туынды ретінде жас ұрпаққа терең ой салып, олардың рухани дамуына ықпал етеді. Мұндай классикалық шығармаларды елімізде сахналау арқылы мәдениет пен өнердің әлеуетін кеңейтіп, ұлттық санаға үйлесімділік, рухани байлық енгізу жолындағы маңызды қадам жасалуда.

Сонымен қатар, Шымкент қаласындағы мұндай премьералар мәдени және білім беру мекемелері арасында ынтымақтастықты арттыруға, шығармашылық әлеуетті дамытуға септігін тигізеді. Операның әсерлі музыкалық қойылымы мен драмалық мазмұны ұлттық құндылықтарды насихаттауда тиімді құрал ретінде қызмет етеді.

Осының бәрі – қазақ халқының рухани мұрасын сақтау мен дамытуға, патриоттық тәрбие мен ұлттық сана қалыптастыруға бағытталған кешенді жұмыстардың бөлінбес бөлігі. Шымкенттегі мұндай мәдени шаралар халықтың рухани байлығын арттырып, жастардың бойында ұлттық мақтаныш пен тарихи сананы қалыптастыруға зор үлес қосады.