Әл-Фараби атындағы қалалық ғылыми-әмбебап кітапханасында 26 қараша күні өткен «Қазақ қоғамындағы әйел мәртебесі» атты тағылымды кездесу кеші өтті.

Аталған шара ұлттық руханиятты жаңғыртуға, қазақ халқының ғасырлар бойы қалыптасқан құндылықтарын заманауи қоғаммен сабақтастыруға бағытталған маңызды шаралардың бірі болды.

Кештің шымылдығын кітапхана директоры, филология ғылымдарының кандидаты Анар Жаппарқұлова ашып, қазақ қоғамындағы әйел образының тарихтан тамыр алатын биік орны, аналардың ақылы мен парасаты ұлт ұйытқысы болғанын атап өтті. Ол осындай іс-шаралар арқылы жастарға салт-дәстүрді, ұлттық болмысты, тарихи сананы терең танытудың маңызын айтты.

Кешке қоғам өмірінің әр саласында еңбек етіп жүрген елге танымал тұлғалар қатысты. Атап айтқанда, «Қазақстан әйелдердің республикалық кеңесі» қоғамдық бірлестігінің Шымкент қалалық филиалының төрайымы, Құрмет орденінің иегері, қала Құрметті азаматы Баян Айтбекқызы ұлттық болмысымыздағы әйелдің тәрбиелік, рухани, қоғамдық рөлі туралы бай тәжірибесімен бөлісті. Ол қазақ әйелінің тек отбасының ғана емес, тұтас қоғамның ұйытқысы болғанын, бүгінгі күнде де ұлттық тәрбиені ұрпаққа жеткізуде басты миссия атқаратынын атап өтті.

Қазақстан Журналистер және Жазушылар одақтарының мүшесі, «Тіл жанашыры» Қабыл Тұрарұлы әйелдің қоғамдағы орны мен парасатын жыр мен зерделі сөздер арқылы тарихтан мысал келтіре отырып баяндады. Ал «Серпіліс» қоғамдық қорының президенті, балаларға арналған «Ақылдым» журналының директоры Бейсенкүл Нарымбетова ұлттық идеологияны қалыптастырудағы аналардың рөлін, өскелең ұрпақтың бойына рухани құндылықтарды сіңіру жолдарын талдады.

«Хан ТВ» телеарнасының төрағасы, журналист Қуанышбек Тасполатұлы Ботабек қазіргі медиакеңістікте әйел бейнесінің дұрыс танылуы, ұлттық құндылықтың ақпараттық қауіпсіздігі туралы ой қозғады. Сонымен қатар Шымкент қаласының Полиция департаменті Тұран аудандық Полиция басқармасынан келген инспектор, полиция аға лейтенанты Наргиза Жәдетқызы Қиюбек қоғамдағы зорлық-зомбылықтың түрлері, оның алдын алу жолдары, отбасы ішіндегі құқықтық мәдениетті қалыптастырудың маңызын түсіндірді.

Бұл кеш ұлттық тәрбие, рухани дәстүрлер мен тарихи сананы жаңғыртуға бағытталған Шымкенттегі кешенді жұмыстардың жалғасы іспетті болды. Қатысушылар қазақ әйелінің болмысындағы асыл қасиеттерді – имандылық, шежіреге деген құрмет, ұлт тәрбиесіндегі жауапкершілік, парасат пен ізгілікті жастарға үлгі ету қажеттігін бірлесе талқылады. Сонымен қатар ұлттық әдеп мәдениетін сақтау, қазақ отбасының дәстүрлі құрылымын нығайту, әйел құқығы мен қауіпсіздігінің қоғамдағы маңызын арттыру жайы да кеңінен сөз болды.

Шара қорытындысында оқырмандар қонақтармен естелік суретке түсіп, қазақ қоғамындағы әйел мәртебесін насихаттауға арналған кітаптар мен материалдармен танысты. Кеш – ұлттық болмысты жаңғыртуға бағытталған рухани тәрбиенің маңызды алаңына айналды.