Қазақстанның мәдениеті мен дәстүрі бай, рухани құндылықтары мол ел екеніне ешкім шүбә келтіре алмайды. Ал, оның әр өңірі өзіне тән ұлттық болмысымен ерекшеленеді.

Соның ішінде Шымкент қаласы – елдің оңтүстік бөлігіндегі мәдени орталықтардың бірден-бір қара шаңырағы ретінде ұлттық өнер мен салт-дәстүрді сақтау мен дамытуға ерекше мән беріп келеді. Мысалға, 2025 жылдың қараша айының соңында өтіп жатқан Абай облысындағы Шымкент қаласының мәдениет күндерін айтып өтсек болады. Себебі, аталған шара екі өңір арасындағы рухани байланыс пен мәдениет өркениетінің айрықша көрінісі. 

Бұл шара екі жақтың мәдениетін, өнерін жақындастырып, халық арасындағы татулық пен өзара түсіністікті нығайтуға бағытталған. Мәдени күндерге Шымкенттің театрлары, концерттік топтары, цирк ұжымдары мен өнер қайраткерлері қатысты. Олар ұлттық музыка, театр қойылымдары, дәстүрлі және заманауи өнер үлгілерін көрсетті.

Шараның маңызды бөлігі – қатысушылардың «Жидебай-Бөрілі» қорық-мұражайына барып, қазақ әдебиеті мен мәдениетінің қайнар көздеріне сапар жасауы болды. Бұл экскурсия қазақтың ұлы ақыны Абай Құнанбаевтың рухани мұрасын терең түсінуге мүмкіндік берді. Сондай-ақ, мұндай сапарлар жастар арасында патриоттық сезімді оятып, тарихи-мәдени білімдерін арттырады.

Шымкенттің мәдениет күндері Абай облысында тек өнер көрсетумен ғана шектелмей, екі өңір арасындағы мәдени ынтымақтастықты нығайтуға, рухани құндылықтарды сақтап, жаңғыртуға зор үлес қосуда. Бұл шаралар ұлттық бірлікті бекемдеп, жастардың мәдени сана-сезімін арттыруға мүмкіндік береді.

Атап айтсақ, Шымкенттен арнайы барған өнер ұжымдары мен зиялы қауым өкілдерін семейліктер әуежайдан ұлттық дәстүрге сай сән-салтанатпен қарсы алып, қонақжайлықтың үздік үлгісін көрсетті. Қонақтарға Абай елінің мәдениеті таныстырылып, ән мен жырдан шашу шашылды. 

Мәдени күндер екі күнге жоспарланып, оған әзіл-сықақ және сатира театрының қойылымдары, «Шежірелі Шымкенттен – Ұлы Абай еліне» атты концерттік бағдарламалар, әдеби-танымдық кездесулер мен көрмелер кірді. Атап айтқанда, Шымкент қалалық әзіл-сықақ және сатира театры Уәлибек Әбдірайымовтың «Не істеу керек?» атты музыкалық комедиясын Семей жұртшылығына ұсынды. Бұл қойылым қоғамдағы өзекті мәселелерді жеңіл әзілмен қозғап, көрерменнің жүрегіне жол тапты. Театр ұжымы сахнадағы орындау шеберлігімен, шығармашылық жаңашылдығымен ерекше ықыласқа ие болды.

Абай облыстық әмбебап кітапханасында еліміздің көрнекті жазушысы, Мемлекеттік сыйлық иегері Құлбек Ергөбек пен абайтанушы ғалым Ақжол Қалшабек оқырмандармен шығармашылық жүздесу өткізді. «Ғибратты ғалымдармен сыр-сұхбат» атты бұл шара әдебиет, ұлттық мұра, Абайтану ғылымының өзекті мәселелерін талқылауға арналып, зиялы қауым мен әдебиетсүйер қауымға рухани азық болды. Кездесуді Шымкент қалалық ғылыми-әмбебап кітапханасының директоры, филология ғылымдарының кандидаты, айтыскер ақын Анар Жаппарқұлова жүргізді.

Бұл мәдени күндер аясында айтыскер ақын Мейіржан Жақып ұлы ойшыл Абайға арналған жырларын арнап, дәстүрлі әншілер Тұрар Әлменов пен Руслан Ақынбеков әсем әндерімен кешке ерекше сән берді.

Шымкент қаласының делегациясы Абай облысында ұлы ақынның ескерткіштеріне гүл шоқтарын қойып, оның рухына тағзым етті. Сонымен қатар, Абай музейіне арнайы барып, қазақ әдебиеті мен мәдениетінің асыл қазынасы саналатын жәдігерлерді тамашалады.

«Абайға құрмет» акциясы аясында Қазақстан өңірлерінің Абай облысына тартуы ретінде әлеуметтік-мәдени нысандар салу жобалары таныстырылды. Осы бастама аясында Шымкент қаласы да Абай облысында заманауи өнер мектебін салуды жоспарлап отыр. Бұл мектеп өңірдегі мәдени-интеллектуалдық әлеуетті арттырып, жас таланттарды қолдауға және олардың шығармашылық қабілеттерін дамытуға мүмкіндік бермек.

Шымкент қаласының мәдениет күндері аясындағы сапарлар мен іс-шараларды ұйымдастыруда SCAT әуе компаниясының қолдауы ерекше атап өтілді. Шымкент пен Семей арасында екі чартерлік рейс ұйымдастырылып, делегация мүшелерінің сапары жеңілдетілді. Бұл қолдау мәдени ынтымақтастықты дамытудағы маңызды факторлардың бірі болды.

Абай облысында өткен Шымкент қаласының мәдени күндері – рухани құндылықтарды насихаттау, ұлттық өнер мен тарихты дәріптеу жолындағы маңызды оқиға. Бұл тек мәдени-ойын-сауық іс-шарасы емес, сонымен бірге халық арасындағы бірлікті, татулықты арттыруға бағытталған әлеуметтік маңызы зор бастама. Мұндай жобалар қазақ халқының ұлттық болмысын сақтап, оны жаңа буынға жеткізуде таптырмас құралы болып табылады. Сондықтан Шымкент пен Абай облысының рухани байланысы әрі қарай да жалғасын тауып, қазақ мәдениеті мен тарихының жаңа белестерін бағындыруына сенім мол.