Шымкент қаласында соңғы күндері кешкі уақытта ауада түтіннің байқалуы тұрғындар арасында алаңдаушылық туғызған.

Бұл құбылыстың негізгі себептері қатарында ауа температурасының төмендеуі, желдің болмауы, автокөліктердің көп шоғырлануы және жеке секторларда құрғақ шөп пен күзгі жапырақтарды жағу жағдайларының артуы бар. Осыған байланысты қала әкімдігі атмосфералық ауа сапасын бақылауды күшейтуді қолға алды.

Қала ауасындағы сапа «Қазгидромет» мекемесінің 7 бақылау бекеті арқылы үздіксіз бақыланып келеді. Оның 4-еуі қолмен сынама алуға арналған болса, 3-еуі автоматтандырылған жүйе арқылы онлайн режимде жұмыс істейді. Өңірлік коммуникациялар қызметінде өткен брифингте қала әкімінің орынбасары Сәрсен Құранбек осы бағыттағы жұмыстың нәтижесін жариялап өтті. Қазіргі уақытта жоғарғы немесе экстремалды ластану фактілері тіркелмеген.

2025 жылғы 23–24 қарашада тұрғындардан түскен шағымдарға байланысты Индустриалды аймақтар мен «ПетроҚазақстанОйлПродактс» ЖШС аумағында мониторинг жүргізілді. Тексеру барысында санитарлық қорғау аймағында ластаушы заттардың шекті рұқсат етілген нормадан асқаны анықталған жоқ. Бұл – қаладағы өндірістік нысандардың экологиялық талаптарды сақтайтынының айқын дәлелі.

Қаладағы төрт ірі кәсіпорын – «ПКОП», «Стандартцемент», «Шымкентцемент» ЖШС және «3-Энергоорталық» АҚ – автоматтандырылған мониторинг жүйесімен тұрақты бақылауда. Сонымен қатар, тұрғындардың шағымдары бойынша «Ордабасы» Индустриалды аймағындағы бір кәсіпорынға тексеру тағайындалды. Барлық шаралар – қала ауасының сапасын тұрақты бақылауда ұстау және тұрғындардың денсаулығын қорғау мақсатында жүзеге асырылып отыр.

Сонымен қатар, Шымкент қаласы әкімдігі жасыл желекті сақтау мен дамытуға ерекше мән беріп отыр. Қалалық жайлы ортаны дамыту басқармасына қарасты екі шатқал тұрғындар үшін демалыс орны ретінде қызмет көрсетеді. «Шымсая» шатқалы Қаратау ауданында орналасқан және аумағы 8 гектарды құрайды. Биыл күзгі ағаш отырғызу маусымында шатқал аумағы 8 200 дана көшетпен толықтырылып, жасыл желек аймағы кеңейтілді. Бұл шатқалды «Жасыл белдеу» КММ күтіп-ұстап, абаттандыру жұмыстарын жүргізуде.

Самал шатқалы Абай ауданында орналасқан және 25,772 гектар жерді қамтиды. Бұл шатқал қалалық жайлы ортаны дамыту басқармасына 2020 жылғы шешімге сәйкес тапсырылған. Айта кету керек, аумақта ешқандай қазба жұмыстары жүргізілмеген, 2021 жылдан бері көгалдандыруға қосымша қаржы бөлінбеген. Дегенмен, әкімдік бұл аймақтарды сақтау мен дамытуға басымдық беріп, тұрғындар үшін демалыс алаңын қалыптастыру жұмыстарын жалғастыруда.

Қаланың жасыл аймақтарын кеңейту және ауаны ластаушы факторларды азайту бойынша шаралар, тұрғындар үшін таза ауа мен жайлы орта қалыптастырудың басты құралы. Ауа сапасын бақылау мен мониторинг жүргізу, өндірістік қалдықтарды азайту және жасыл желекті көбейту бағытында әкімдік жүйелі жұмыс атқаруда. Бұл жұмыстар тұрғындардың денсаулығын қорғауға, экологиялық қауіпсіз қаланы дамытуға және қала атмосферасының таза болуына тікелей ықпал етеді.

Шымкент қаласы әкімдігі алдағы уақытта да мониторинг жүргізуді жалғастырып, атмосфералық ауа сапасын жақсарту және жасыл аймақтарды дамыту бағытында нақты іс-шараларды жүйелі түрде жүзеге асыруға ниетті. Қала тұрғындары үшін жасыл саябақтар мен таза ауа өмір сапасы мен денсаулық кепілі, сол себепті билік бұл мәселеге ерекше назар аударып отыр.