Шымкент қаласында әлеуметтік маңызы бар азық-түлік тауарларының бағасын тұрақтандыру мәселесі күн тәртібінен түскен емес. 

Өңірлік коммуникациялар қызметінің алаңында өткен брифингте қала әкімінің орынбасары Сәрсен Құранбек осы бағытта атқарылып жатқан жұмыстардың нәтижесін баяндады. Әсіресе, тұрғындар жиі тұтынатын картоп пен ет өнімдерінің бағасы бойынша нақты түсініктеме берілді.

Қалаға картоп негізінен Павлодар мен Қарағанды облыстарынан жеткізіледі. Сондықтан баға әрдайым өндіруші өңірлердегі нарықтық жағдайға тәуелді болып отыр. Соңғы уақытта сол аймақтарда көтерме бағаның өсуі байқалып, бұл өзгеріс Шымкент нарығына да әсерін тигізген. Қазіргі таңда қаладағы көкөніс сататын орындарда картоп 200-270 теңгеден саудалануда. Бұл – өнім түрі көп, маусым ауысқан кезеңге тән табиғи баға құбылуы.

Осындай жағдайда әкімдік картоп бағасын тұрақтандыру мақсатындағы «айналым механизмі» тетігін іске қосқан. Бұл механизмге сәйкес, қаладағы ірі сауда желілеріне қаржы бөлініп, картоп белгіленген 180 теңге бағамен сатылуда. Айтуларынша, тұрғындарға дәл осы бағада өнімді ұсыну үшін шаруа қожалықтарымен 21 мың тонна картоп жеткізу туралы келісімдер жасалып қойған. Нәтижесінде қалада картоп тапшылығы туындамаған, ал тұрғындар өнімді нарықтағыдан төмен бағада сатып ала алуда.

Сәрсен Құранбек бұл қадамдар бағаны жасанды түрде төмендету емес, керісінше, нарықтағы күрт өзгерістерді реттеу үшін уақытылы қолға алынған жүйелі шаралар екенін атап өтті. «Басты мақсат халықты қолжетімді бағамен қамтамасыз ету. Сол үшін өндірушілермен, тасымалдаушылармен, сауда нүктелерімен тұрақты келісім жүргізілуде», – деді әкім орынбасары.

Брифинг барысында жылқы етіне қатысты да өзекті ақпарат жарияланды. Шымкент қаласына бұл өнім негізінен Түркістан облысынан келеді. Қарабұлақтағы мал сою бекеттерінде жылқы етінің көтерме бағасы 3 100–3 200 теңге көлемінде болса, қаладағы базарларда 3 400–3 500 теңгеге дейін жетеді. Баға өсіміне көрші елдерге ет экспортының артуы және жем-шөптің қымбаттауы басты себеп болып отыр. Соңғы жылдары мал шаруашылығы саласында шығындардың көбеюі еттің өзіндік құнына тікелей әсер етуде.

Бағаның шектен тыс қымбаттап кетпеуі үшін қала аумағында апта сайын алты орында ауыл шаруашылығы жәрмеңкелері ұйымдастырылып келеді. Жәрмеңкелерде шаруалар өз өнімдерін тікелей саудалап, делдалсыз жұмыс істеуге мүмкіндік алады. Бұл өз кезегінде бағаны 3 400 теңгеден асырмауға жол ашып отыр. Тұрғындардың да қызығушылығы жоғары. Жәрмеңке нарықтағы балама бағалардың реттеушісі әрі халықтың таңдауы кеңейетін алаң.

Әкім орынбасары атап өткендей, мемлекет бақылауында болатын әлеуметтік маңызы бар азық-түлік тізіміне жылқы еті кірмейді. Тізімде тек сиыр етінің сүйекті жауырын-төс бөлігі бар. Сондықтан бағаны тұрақтандыру жұмыстары дәл осы өнімге бағытталған. Шымкентте ірі сауда желілерімен және ет өндіруші шаруашылықтармен келісімшарттар жасалып, әлеуметтік дүкендер арқылы сиыр еті нарықтан төмен бекітілген бағамен сатылып жатыр.

Бұл шаралар тұрғындардың әлеуметтік қорғалатын тобы үшін өте маңызды. Әсіресе, жаңа жылдан кейінгі маусымдық баға өзгерістері байқалатын уақытта әкімдік тарапынан жүргізілетін мониторинг пен алдын алу жұмыстары азық-түлік қолжетімдігін қамтамасыз етеді.

Шымкент қаласы әкімдігі алдағы уақытта да азық-түлік нарығындағы жағдайды тұрақты бақылауда ұстамақ. Бағаны реттеу жөніндегі тетіктер кезең-кезеңімен жетілдіріліп, нарықтағы күрт өзгерістерге дер кезінде әрекет ету жалғаса бермек.