Шымкент қаласында атаулы әлеуметтік көмек тағайындау ісіне қатысты жүргізілген мониторингтің кезекті қорытындысы белгілі болды. 

Бұл туралы Өңірлік коммуникациялар қызметінің алаңында өткен брифингте қала әкімінің орынбасары Сәрсен Құранбек әлеуметтік саладағы жағдайды жан-жақты түсіндіріп, атқарылған жұмыстар туралы баяндады.

Әкімдік өкілі атаулы әлеуметтік көмек тек материалдық қолдау ғана емес, азаматты қоғамға бейімдеудің, еңбекке ынталандырудың маңызды құралы екенін атап өтті. Осы мақсатта Мансап орталығы мен жергілікті органдардың міндеттері айқын белгіленіп, жұмыс үдерісі нақты тәртіпке қойылған. Әрбір өтініш иесімен жеке жоспар әзірлеу және әлеуметтік келісімшарт жасасу осы жүйенің негізгі тетігі болып отыр. Бұл келісімшарт арқылы азаматқа көмек көрсететін мамандар кеңес беріп қана қоймай, қажетті құжаттарын рәсімдеуіне көмек береді, жұмыс іздеу жолында бағыт-бағдар береді, әлеуметтік бейімдеу шараларына қатысуына көмектеседі және барлық кезеңде бірге жүреді. Жоспардың орындалуы ай сайын тексеріліп, әрбір қадам нақты бағаланады.

Брифинг барысында жарияланған деректерге сүйенсек, атаулы әлеуметтік көмекке қол жеткізу үшін кейбір азаматтардың шындыққа сәйкес келмейтін мәлімет бергені анықталған. Мониторингтік топтың жұмысына Еңбек мобильдігі орталығының ассистенттері, учаскелік комиссия мүшелері және Еңбек ресурстарын мониторингілеу бөлімінің мамандары жұмылдырылған. Олар үй-үйді аралап, отбасылардың тұрмыстық жағдайын зерделеп, табыс көздерін салыстыру жұмыстарын жүргізген.

Осындай тексеріс барысында 546 жеке кәсіпкердің атынан тапсырылған құжаттардан күмәнді жайттар табылған. Құжаттарда 1208 азаматтың 85 мың теңге көлемінде жалақы алатыны туралы бұйрық көшірмелері көрсетілген. Алайда Мемлекеттік кірістер департаментінің мәліметтері бұл деректердің бір бөлігі шындыққа жанаспайтынын көрсетті. Нақтырақ айтқанда, 314 жеке кәсіпкердің атына тіркелген 545 азаматтың шын мәнінде жұмыс істемейтіні белгілі болды. Бұл — табысын төмендетіп көрсету арқылы атаулы әлеуметтік көмекке заңсыз қол жеткізуге тырысқан әрекеттер болуы мүмкін.

Тексеру тобы жүргізген рейд барысында тағы бір маңызды жайт анықталған: 13 жұмыс берушіде тіркелген 34 азамат жұмыс орнында жоқ болып шыққан. Яғни, олар іс жүзінде қызмет атқармайды, бірақ ресми түрде жұмыс істейтін адамдар қатарында жүрген. Мұндай фактілер әлеуметтік қолдауға шын мұқтаж отбасылардың құқығына нұқсан келтіретінін айтқан қала әкімінің орынбасары, бұл жағдайға бей-жай қаралмайтынын жеткізді.

Мониторинг нәтижесінде анықталған қарама-қайшы деректер бойынша қазіргі таңда АӘК тағайындаудан бас тарту туралы шешімдер әзірленіп жатыр. Заңнамаға сәйкес, жалған мәлімет берген азаматтар жауапкершілікке тартылуы мүмкін. Әкімдік өкілі бұл әрекеттерді тек мемлекетті алдау емес, қоғамның әлсіз тобына қолдау көрсетуге бағытталған саясатқа кедергі келтіру деп бағалады.

Сәрсен Абайұлының айтуынша, қалада әлеуметтік көмекті әділ бөлу үшін бақылау шаралары әрі қарай да күшейтіледі. Мемлекет тарапынан берілетін көмектің әрбір теңгесі өз мақсатында жұмсалуы тиіс. Сондықтан да мониторинг жұмыстары тұрақты жүргізіліп, анықталған әрбір жағдай бойынша нақты шара қолданылатын болады.

Шымкентте әлеуметтік қолдау бағытындағы жұмыстардың ашықтығы мен әділдігін арттыру қала әкімдігінің басты міндеттерінің бірі. Бүгінгі мониторинг қорытындысы бұл бағытта әлі де жауапты әрі мұқият жұмыс жүргізу қажеттігін көрсетіп отыр.