2025 жылдың басынан бастап Шымкент қаласында қала инфрақұрылымын дамыту мақсатында ауқымды жұмыстар жүргізілуде. Осы бағытта биыл 341 жер учаскесі мемлекет қажеттілігі үшін алынғаны белгілі болды. 

Бұл туралы өңірлік коммуникациялар қызметінде өткен брифингте қала әкімінің орынбасары Сәрсен Абайұлы мәлімдеді.

Жер қатынастары басқармасының мәліметінше, алынған учаскелердің басым бөлігі иелеріне ақшалай өтемақы төленіп, қалғанына тең бағалы жер телімдері берілген. Мұндай шаралар мегаполисте жаңа жол, инфрақұрылым және дамушы аудандар жобаларын іске асыру үшін маңызды болып табылады.

Қонаев даңғылының 5-кезеңі бойынша 270 учаске қажеттілік ретінде қарастырылған. Оның 253-і үшін иелерге өтемақы төленіп, жер мемлекет меншігіне өткен. Бұл магистральды кеңейту жұмыстары қаланың жол қозғалысын жеңілдетуге және көлік кептелісін азайтуға мүмкіндік береді.

Сонымен қатар, А-2 автожолы бағыты бойынша 80 учаске қарастырылған. Қазіргі таңда 25 жер учаскесіне өтемақы төленіп, мемлекет меншігіне алынған. Жобаның мақсаты – қаладағы жүк және жеңіл көліктің қозғалысын реттеп, транспорттық инфрақұрылымды дамыту.

С.Бәйтереков көшесінің жалғасы – Ы.Алтынсарин көшесін қайта құру жобасы аясында 56 учаске қарастырылған. Қазіргі уақытта 42 жер иесімен келісім жасалып, өтемақы төленді. Бұл жол бөлімі қала ішіндегі аудандар арасындағы байланысқа оң әсерін тигізеді.

Қазиев көшесінің жалғасы (Арғынбеков – Төлеметов көшелерінің аралығы) бойынша 25 учаске қажеттілікке алынып, 21 жер телімі толық мемлекет меншігіне өтті. Жоба қаладағы дамушы аймақтарды қосып, тұрғындар үшін тиімді инфрақұрылым жасауға бағытталған.

Қала әкімдігі хабарлағандай, жер учаскелерін мемлекет мұқтажына алу процесі заңға сәйкес жүзеге асырылады. Жер иелеріне өтемақы төлеу немесе тең бағалы телім ұсыну арқылы олардың құқықтары сақталып, әлеуметтік әділеттілік қамтамасыз етіледі.

Жалпы алғанда, бұл жұмыстар Шымкенттің көлік және инфрақұрылым жүйесін жаңғыртуға, жаңа дамушы аудандарды ашуға және қала тұрғындары үшін қолайлы орта қалыптастыруға бағытталған кешенді іс-шаралардың бір бөлігі болып отыр.

Алдағы кезеңде қала әкімдігі жерді мемлекет мұқтажына алу жұмыстарын жалғастырып, инфрақұрылымдық жобаларды жүйелі түрде іске асыруды жоспарлап отыр.