Қоқыс әлемді алаңдатып отырған ауқымды проблемалардың бірі. Дамыған, озық мемлекеттер қоқысты қайта өңдеп, экологияны тазартып, әрі экономикалық жағынан тиімді жобаларды жүзеге асыруда. Танымал «МариМатик» компаниясы - қоқысты қайта өңдеу бағытынан әлемдік озық технологияны жасақтаған бірден бір зауыт болып есептеледі. Жақында аталмыш финляндиялық компанияның өкілдері Түркістан қаласының басшылығымен кездесіп, ауқымды жобаның аясын талқылады. 

- Автоматтандырылған жүйемен тұрғындар үшін ыңғайлы орындарға (қоғамдық және тұрғын үй массивтеріне) қойылған жәшіктерге түскен қалдықтар құбырлар арқылы орталық станциядағы контейнерлерге нығыздалып, контейнерлер қоқыс тасымалдағышпен өңдеуге жөнелтіледі. Бұл жүйеде электр қуатын үнемдеу, қоршаған ортаны қорғау, тұрғындар үшін тиімділік сияқты барлық аргументтер ескерілген. Сондықтан да бұл жоба туристер қабылдаудан озық елдерде, атап айтсақ, Арабияда, Ресейде, Финляндияда жүзеге асырылған, - деді «МариМатик» компаниясының директоры Вакалова Валентина.

 Жоба жетекшілерінің толық ұсынысын тыңдаған қала басшысы Рашид Аюпов қалалық тұрғын үй-коммуналдық шаруашылық бөлімі мен бас архитекторға осы жобаны жүзеге асыруға болатын қолайлы орындарды қарастырып көруді тапсырды.  

Қала басшысы тарапынан бұл жобаны пилоттық жоба ретінде немесе жеке меншік әріптестік негізде жасап көру ұсыныс ретінде айтылды. Қазіргі таңда Халықаралық деңгейде дамыту бағыты қарастырылып жатқан Түркістан қаласында осындай инновациялық тиімді жобаларды жүзеге асыруға жаңа әкім Р.Аюпов қашанда ниетті. Себебі қазіргі таңда қаланың тазалығын реттеу ең бірінші орында тұр.