Түркістан облысы әкімінің орынбасары Нұрбол Тұрашбеков өңірдегі вегетациялық кезеңнің өту барысы мен ағын сумен қамтамасыз ету мәселелеріне арналған мәжіліс өткізді. Жиында суғару маусымының орындалу деңгейі сараланып, аудандардағы ахуал мен туындаған өзекті мәселелер талқыланды. Сонымен қатар жауапты мекеме басшылары мен сала мамандарының есептері тыңдалып, нақты тапсырмалар берілді.

Басқосуда облыстың су ресурстарын тиімді пайдалану, шаруаларды ағын сумен уақытылы қамтамасыз ету және су үнемдеу технологияларын кеңінен енгізу мәселелеріне ерекше назар аударылды. Облыс әкімінің орынбасары суғару жұмыстарының үздіксіз жүргізілуі ауыл шаруашылығы өнімдерінің өнімділігіне тікелей әсер ететінін атап өтті.

Жиын барысында Шардара су қоймасынан жіберілетін судың көлемі туралы мәлімет берілді. Қазіргі таңда су қоймасы арқылы Шардара, Отырар және Арыс аудандарындағы жалпы көлемі 74,7 мың гектар егістік алқап суғарылады. Бүгінгі күнге дейін су қоймасынан 448,3 миллион текше метр су босатылып, шаруалардың қажеттілігіне бағытталған.

Ал Мақтаарал мен Жетісай аудандарының шаруаларын ағын сумен қамтамасыз ететін «Достық» магистральді каналы арқылы 484,5 миллион текше метр су жіберілген. Бұл аудандарда мақта және басқа да ауыл шаруашылығы дақылдарын өсіруде су ресурстарының маңызы ерекше. Сондықтан су жеткізу жұмыстары тұрақты бақылауда тұр.

Сонымен қатар Қазығұрт, Сарыағаш және Келес аудандарындағы шаруаларды сумен қамтамасыз ететін «Зах», «Ханым» және «Үлкен Келес» су арналары арқылы 4251 шаруа қожалығына ағын су берілуде. Жауапты мекемелердің мәліметінше, су жеткізу жұмыстары бекітілген кестеге сәйкес жүргізіліп жатыр.

Облыстық ауыл шаруашылығы басқармасы басшысының орынбасары Досхан Лесов вегетациялық кезеңнің қалыпты жағдайда өтіп жатқанын баяндады. Оның айтуынша, аудандарда су пайдалану кезектілігі белгіленіп, су босату жұмыстары жоспарға сай атқарылуда. Бұл шаруалардың қажеттілігін қамтамасыз етуге және су тапшылығының алдын алуға мүмкіндік беріп отыр.

Жиында су үнемдеу технологияларын енгізу бағытындағы жұмыстар да қаралды. Басқарма басшысының міндетін уақытша атқарушы Әлібек Плаловтың мәліметінше, мемлекет тарапынан көрсетіліп жатқан қолдаудың нәтижесінде қазіргі уақытта 1083 шаруа қожалығы өз алқаптарында су үнемдеу технологияларын қолданып отыр. Сонымен қатар тағы 328 шаруа қожалығы қажетті құжаттарын рәсімдеп, жабдықтаушы кәсіпорындармен келісімшарт жасау кезеңінде тұр.

Бүгінде шаруалар арасында тамшылатып суғару технологиясына деген қызығушылық артып келеді. Бұл әдіс суды үнемдеп қана қоймай, өнімділікті арттыруға және өндіріс шығындарын азайтуға мүмкіндік береді. Су ресурстарының шектеулі жағдайында мұндай технологияларды кеңінен енгізу уақыт талабы болып отыр.

Жиын қорытындысында Нұрбол Тұрашбеков көтерілген мәселелер бойынша жауапты мамандармен бірге шешу жолдарын талқылап, нақты міндеттер жүктеді. Ол су тұтыну шарттарының сақталуын қатаң бақылауға алып, ағын судың кезегін күтіп отырған шаруаларға уақытылы жеткізілуін қамтамасыз етуді тапсырды.

– Су тұтыну шарттарының сақталуына бақылауды күшейтіңіздер. Кезегін күткен шаруаларға су мерзімінде жетуі керек. Бұл бағытта салғырттыққа және қателікке жол беруге болмайды, – деді облыс әкімінің орынбасары.

Жалпы Түркістан облысында су үнемдеу технологияларын енгізу көлемін кезең-кезеңімен ұлғайту жоспарланған. Биыл өңірде мұндай технологияларды 164 мың гектар алқапқа енгізу көзделіп отыр. Бұл өткен жылмен салыстырғанда айтарлықтай жоғары көрсеткіш. Айта кетейік, 2025 жылы облыста су үнемдеу технологиялары 114 мың гектар жерге енгізілген болатын.

Мамандардың пікірінше, су ресурстарын тиімді пайдалану мен заманауи технологияларды енгізу өңірдің аграрлық секторын дамытуға, өнім көлемін арттыруға және су тапшылығы мәселесін шешуге мүмкіндік береді. Сондықтан бұл бағыттағы жұмыстар алдағы уақытта да тұрақты жалғасатын болады.