Түркістан облысының әкімі Нұралхан Көшеровтің төрағалығымен  Түркістан облысы әкімдігі жанындағы терроризмге қарсы комиссияның кезекті мәжілісі өткізілді. Жиын Мемлекет басшысының «Қауіпсіз ел» тұжырымдамасын іске асыру, өңірдегі қоғамдық қауіпсіздікті нығайту, азаматтардың бейбіт өмірін қамтамасыз ету және радикалды идеологияның алдын алу бағытындағы кешенді жұмыстар аясында ұйымдастырылды.

Мәжіліске облыстық терроризмге қарсы комиссия мүшелері, құқық қорғау және арнайы мемлекеттік органдардың басшылары, тиісті департамент жетекшілері, сондай-ақ аудан және қала әкімдері қатысты.

Жиынның негізгі мақсаты – «Қауіпсіз ел» тұжырымдамасы аясында терроризм мен экстремизмнің алдын алу бағытында атқарылып жатқан жұмыстардың тиімділігін арттыру, ведомствоаралық өзара іс-қимылды күшейту және өңірдегі қоғамдық-саяси тұрақтылықты қамтамасыз ету болды.

Комиссия отырысында терроризм мен діни экстремизмнің алдын алу бағытында жүргізіліп жатқан кешенді профилактикалық шаралар, ақпараттық-түсіндіру жұмыстары және халықтың құқықтық сауаттылығын арттыруға бағытталған жобалардың орындалу барысы қаралды. Бұл ретте мемлекеттік органдар мен жергілікті атқарушы құрылымдардың есептері тыңдалып, атқарылған жұмыстарға талдау жасалды.

«Қауіпсіз ел» тұжырымдамасының негізгі қағидаттарына сәйкес, өңірде қауіпсіз қоғам қалыптастыру, азаматтардың құқықтары мен бостандықтарын қорғау, радикалды идеологияның алдын алу және жастар арасында тұрақты иммунитет қалыптастыру бағытындағы жұмыстар жүйелі түрде жүргізілуде. Әсіресе білім беру ұйымдары мен жастар ортасында профилактикалық іс-шараларға ерекше назар аударылуда.

Сонымен қатар жиын барысында ақпараттық кеңістіктегі қауіпсіздік мәселелері де қаралды. Әлеуметтік желілер мен интернет кеңістігінде теріс идеологияның таралуының алдын алу, жалған ақпаратқа қарсы әрекет ету және халық арасында түсіндіру жұмыстарын күшейту қажеттігі атап өтілді.

Облыс әкімі Нұралхан Көшеров өз сөзінде «Қауіпсіз ел» тұжырымдамасын тиімді жүзеге асыру – тек құқық қорғау органдарының ғана емес, барлық мемлекеттік органдар мен қоғамның ортақ міндеті екенін атап өтті. Ол өңірдегі тұрақтылық пен қауіпсіздік – әлеуметтік-экономикалық дамудың басты негізі екенін айтып, барлық жауапты құрылымдарға нақты тапсырмалар жүктеді.

Атап айтқанда, терроризм мен экстремизмнің алдын алу бағытындағы жұмыстарды күшейту, ақпараттық-түсіндіру іс-шараларын кеңейту, жастармен жүйелі жұмыс жүргізу және жергілікті жерлерде профилактикалық бақылауды арттыру міндеттелді.

Мәжіліс қорытындысында мемлекеттік органдар тарапынан атқарылып жатқан кешенді шаралар мен қол жеткізілген нәтижелер сараланып, «Қауіпсіз ел» тұжырымдамасын іске асыру аясындағы өңірлік қауіпсіздік жүйесін одан әрі жетілдіру бағыттары айқындалды.

Жиын соңында жауапты органдарға ведомствоаралық үйлесімді жұмысты күшейту, алдын алу шараларын жүйелі жүргізу және өңірдегі қоғамдық қауіпсіздікті қамтамасыз ету бойынша нақты тапсырмалар берілді.

Алдағы уақытта да Түркістан облысында «Қауіпсіз ел» тұжырымдамасын іске асыру бағытындағы жұмыстар тұрақты бақылауда болып, терроризм мен экстремизмнің алдын алуға бағытталған кешенді шаралар жүйелі түрде жалғасын табады.