Шымкент қаласында тұрғындардың өмір сүру сапасын арттыру мен қаланың экологиялық тепе-теңдігін сақтау бағытында ауқымды жұмыстар атқарылып келеді.

Соның айғағы – Тұран ауданында жаңа саябақтар мен демалыс аймақтарының салынуы. Бұл бастама мегаполистің әлеуметтік және экономикалық дамуының маңызды бөлігіне айналып отыр.

Биыл Тұран ауданында қаланың келбетін көркейтіп, тұрғындарға жайлы демалыс ортасын қалыптастыру мақсатында бес жерде абаттандыру және көгалдандыру жұмыстары басталды. Бұл жобалар — қала экожүйесін жақсартуға және тұрғындардың бос уақытын тиімді өткізуіне бағытталған нақты қадамдар.

Қазіргі уақытта Арғынбеков және Бәйтереков көшелерінің қиылысында жалпы аумағы 0,15 гектарды құрайтын жаңа саябақтың құрылысы толық аяқталды. Мұнда серуендеуге арналған жолдар, орындықтар, жарық шамдар мен заманауи ландшафтық дизайн элементтері орнатылған.

Сонымен қатар, саябақтар келесі мекенжайлар бойынша салынып жатыр: Гагарин көшесі, 32 мекенжайында; Отырар шағынауданындағы Тасқұдық көшесінде; Диваев көшесінде – инвестициялық жоба аясында; сондай-ақ демеушілердің қолдауымен Байтұрсынов және Рысқұлов көшелерінің қиылысында жаңа демалыс алаңы бой көтеруде.

Бұл қоғамдық кеңістіктер тек ауданның сәнін келтіріп қана қоймай, жергілікті тұрғындардың серуен құрып, отбасы мен балаларымен уақыт өткізуге арналған сүйікті орындарына айналмақ. Саябақтарда орнатылған спорттық және ойын алаңшалары жастардың бос уақытын тиімді өткізуіне мүмкіндік береді.

Мамандардың айтуынша, мұндай жобалар қала тұрғындарының экологиялық мәдениетін арттырып, таза әрі жайлы орта қалыптастыруға зор әсер етеді. Ал кәсіпкерлер мен инвесторлардың қолдауымен жүзеге асып жатқан жобалар — мемлекеттік-жекеменшік әріптестіктің тиімділігін дәлелдейді.

Шымкент қаласы бүгінде жайлы өмір сүру ортасын қалыптастыруға бағытталған ірі урбанистикалық өзгерістердің кезеңінде тұр. Қаланың әлеуметтік және экономикалық дамуы тұрғын үй құрылысы, көлік инфрақұрылымы, білім және медицина нысандарымен қатар, демалыс аймақтарының да көбеюімен өлшенеді.

Қорытындылай келе, Тұран ауданындағы жаңа саябақтардың салынуы – Шымкенттің жасыл аймақтар үлесін ұлғайтып, экологиялық тұрақтылықты сақтауға бағытталған маңызды бастама. Бұл жұмыстар қаланың эстетикалық келбетін жақсартып қана қоймай, тұрғындардың өмір сүру сапасын арттырып, мегаполистің заманауи әрі жайлы қала ретіндегі мәртебесін нығайта түседі.