Алматыда дәретханадан табылған шақалақтың жағдайы ауыр. Бұл туралы қалалық денсаулық сақтау басқармасынан мәлім етті, деп хабарлайды Oinet.kz тілшісі Stan.kz ақпарат агенттігіне сілтеме жасап.

25 тамыз күні таңғы сағат 06:53-те Балаларға жедел медициналық көмек көрсету орталығына жаңа туған нәресте түскен. Шақалақ бірден жансақтау бөліміне жатқызылды.

"Нәресте шала туған. Яғни, 21-22 аптада дүниеге келген. Гипотермияға байланысты қазіргі уақытта баланың жағдайы өте ауыр. Реанимация бөлімінде қарқынды терапия алып жатыр", - деп хабарлады басқармадан.

Баланың 17 жастағы анасы да ауруханада жатыр. Қазір оның жағдайы орташа ауыр деп бағалануда.

"Науқас №4 қалалық клиникалық аурухананың гинекология бөліміне жатқызылды. Қазіргі уақытта жағдайы орташа, тұрақты. Клиникалық хаттама бойынша толық көлемде ем қабылдап, тексеруден өтеді", - деп атап өтті қалалық денсаулық сақтау басқармасынан.

Еске салайық, 25 тамыз күні түнде қаланың Түрксіб ауданында жаңа туған нәрестені құтқаруға арналған арнайы іс-шара өтті. Түрксіб аудандық полиция басқармасының кәмелетке толмағандар ісі жөніндегі учаскелік инспекторы Нұржан Шатуновтың айтуынша, сағат екіде кәмелетке толмаған қыздың түсік тастағаны туралы хабар берілген. Полицей дәретхана шұңқырынан шақалақты алып шықты. Кейін Ішкі істер министрі Марат Ахметжановтың бұйрығымен полиция капитаны Нұржан Шатунов батылдығы үшін майор шенін алды.