Түркістан облысында Састөбе ауылының тұрғындары мердігермен арадағы дауларын шеше алмай жүр. Билік халықты жаңа үйге көшіргенімен, мәселе шешімін таппады, деп хабарлайды Oinet.kz тілшісі Otyrar.kz сайтына сілтеме жасап.

Састөбеде билік берген жаңа үйдің төбесінен су ағып, қабырғалары опырылып, қасбеттері жарылған. Тұрғындардың айтуынша, көпқабатты үй қирауда. Билік мердігер компанияның кепілдік мерзімі бар екенін айтып, тек күтуді ұсынады.

Көпқабатты үй мемлекеттік жалға берілетін тұрғын үй бағдарламасы бойынша салынған. Бұл үйде ерекше қажеттілігі барлар, жетімдер және көп балалы отбасылар тұрады.

Тұрғын Ира Жойшыбекова жаңа баспананың әуелі сылағы опырылып, кейін төбесінен су аға бастағанын айтады. Әкімдік пен мердігерге хабарласқанымен, нәтиже болмады дейді.

"Жыл сайын бір нәрсе қайталана береді. Подъезден су кетіп жатыр. Бәрі қирады. Төбеден және терезеден су ағып жатыр. Мердігер бәрін көрді де, біреуді әкелді. Ол бәрін желіммен бекітіп, “бәрі жақсы” деді. Қай жері жақсы? Сонда да су кетіп жатыр", – дейді Састөбе ауылының тұрғыны Ира Жойшыбекова.

Әйел қабырға құлап қала ма деп қорқатынын айтады. Сонымен қатар билік бес жылдық кепілдік мерзімін алға тартып, бәрін жөндейміз деп қана уәде берген. 

Түлкібас ауданының әкімі проблемалардың барын және олардың тез арада шешілетінін мойындап отыр. Телефон арқылы Нұржан Ізтілеуов жөндеу қысқа мерзімде жүргізілетінін, егер сапасыз жұмыс жүргізсе, мердігер тиісті жазасын алатынын айтты.

"Бұл үйді қалай қабылдағанын айта алмаймын, ол кезде мен болмадым. Мердігерлермен сөйлестік, олар наурызға дейін барлық мәселені шешеді", – дейді Түлкібас ауданының әкімі Нұржан Ізтілеуов.

Тұрғындар өз ауласындағы аумақты абаттандыруды талап етуде. Билік екі жылдан бері мәселені шешеміз деп уәде беріп келеді.