«Бауырларыңды көрмейсің»: Ұлытау облысында 3 баланы тасбауыр әйел 5 жыл бойы құлдықта ұстаған

Oinet.kz 20-02-2024 546

Жетім балаларды асырап алып, артынша құлдыққа салған тасбауыр әйел ұсталды, деп хабарлайды Oinet.kz тілшісі.

Screenshot_7.jpg

Бұл туралы ҚР Бала құқықтары жөніндегі уәкіл Динара Зәкиева Instagram желісіндегі парақшасына жазды.

Оның мәліметінше, Ұлытау облысы әкімі Берік Әбдіғалиұлы, прокуратура, ІІМ-мен аталмыш істің мән-жайы мен қажетті шараларды зерделеген.

"Ақпанның басында облыстық прокуратура мен қамқоршылықтың мобильді топтарының тексерісі нәтижесінде бір отбасынан шыққан үш бала – 1 қыз және 2 ұл бары анықталды. Патронаттық тәрбиеге алған отбасы оларды балалар үйінен 2018 жылы алған. Ол кезде балалар 14, 12 және 8 жаста болған. Балалардың үлкенін қалаға 20 км қашықтықтағы өз фермасында еркінен тыс ұстап, мал бағуға мәжбүрлеген. Фермада екі табын жылқы мен 18 сиыр бар", - деп жазды Бала құқықтары жөніндегі уәкіл.

Динара Зәкиеваның хабарлауынша, фермаға арнайы барған комиссия мүшелері балалардың қандай жағдайда өмір сүріп жатқанын көздерімен көріп, жағаларын ұстаған. Денелерінде сау тамтық жоқ, көгерген, тыртыққа толы екенін аңғарған. Балалар жүдеу, шаршаңқы, аш, кір-қожалақ, киімдері жыртық болған. Балаларды қамқорлығына алған ата-ана оларды қорлап, ұрып, азаптап, құлдай жұмсағаны белгілі болды. Сорақысы қамқоршы 5 жыл бойы балаларға жәрдемақы алып келген.

"Қамқоршы балаларды қорлап, ұрып, азаптап, құлдай жұмсап, 5 жыл бойы балаларға жәрдемақы алып келген. Балалардың үлкені – қыз, колледжді тәмамдаған, алайда іс жүзінде сабаққа мүлде бармаған. Ортаншы ұл колледжде "оқиды". Құқық қорғау органы білім мекемесін тексерсе, ата-анасы тарапынан үнемі балалардың ауырғаны туралы анықтамалар ұсынып отырған екен. Қамқоршы қызды жұмыс істемесең, не шағымдансаң, бауырларыңды көрмейсің деп қорқытқан", - делінген жазбада.

Белгілі болғандай, бұл қамқоршы жақында "патронатқа алуға болатын басқа да балалар бар ма?" деп сұрастырған екен.

"Қылмыстық іс тіркелді, сараптамалар жүргізіліп жатыр. Қазір балалар қауіпсіз жерде, ең бастысы олар бірге. Тиісті психологиялық көмек көрсетіліп жатыр. Облыс әкімі балаларға қолайлы жағдай жасап, көмек көрсетуді, балалардың қайда тұратынын, қайда оқитынын жеке бақылауына алды. Басынан бастап балалардың қасында болған өңірлік уәкіл Гүлмира Алпысбайқызына және мәслихат депутаты Еркебұлан Бодықовқа алғыс айтамын", - деп хабарлады Динара Зәкиева өз жазбасында.

Оның мәліметінше, қазір ІІМ, Прокуратура мен басқа да мемлекеттік органдар бірлесіп бүкіл ел бойынша пилоттық режимде жұмыс істейтін мобильді топтар құрған.

"Олардың міндеті – зорлық-зомбылыққа ұшыраған, өмірлік қиын жағдайдағы балаларды жедел түрде анықтау. Көп ұзамай бұл механизм Президент тапсырмасымен әзірленген Балалар қауіпсіздігін қамтамасыз ету туралы заң жобасы аясында алдын-алу құралы ретінде заңнамалық тұрғыдан бекітілмек", - деді Бала құқықтары жөніндегі уәкіл.

Атырауда қайғылы оқиғадан ер адам көз жұмды
«Мектепте құлшылық етуге жол берілмейді»: Министрлік сабақ кезінде намаз оқыған оқушылар жайлы
Сәйкес тақырыптар
Көтерілу